AYAW GAMIT OG PABUTO: DENR 7

Gihangyo karon ang publiko nga unta di mogamit og pagbuto sa pagsugat sa Pasko ug Bag-ong Tuig.

Pipila ka adlaw sa di pa ang Pasko, nihangyo ang Department of Environment and Natural Resources (DENR) 7 sa publiko nga di mogamit og pabuto o bisan fireworks sa pagsugat sa maong selebrasyon aron malikayan ang kadaot nga epekto sa kalikopan ug panglawas sa tawo.

Matod ni DENR 7 Regional Director Gilbert Gonzales nga maghatag og polusyon sa hangin ang pabuto hilabi na ang

pyrotechnics susama sa abog, sulfur, uling, nga makadaot sa respiratory system.

Gidasig hinuon ni Gonzales ang Sugbuanon nga mogamit og luwas ug lingaw nga alternatibo sa pabuto susama sa torotot, paghapak-hapak sa mga gamit sa kusina, pagpatingog sa busina sa sakyanan, o pagpatukar aron pabilin nga lingaw kini nga maselebrar.

Gipahinumduman usab ang publiko nga likayan ang pagsunog og ligid nga mobuga og carbon monoxide ug ubang makahilo nga metal susama sa zinc nga dilikado kon masimhot.

“By using firework alternatives, this would also mean fewer occurrences of fires, injuries and even casualties,” matod ni Gonzales.

Gawas sa gitagana nga common areas alang sa pagpabuto o fireworks, gipahinumdoman usab ang publiko nga mopalit niining mga produkto nga minus ang packaging nga gigamit.

Kini aron malikayan ang basura karong holiday season. “We must be responsible enough to take care of our environment by thinking and acting “green” as we have been experiencing the brunt of our own actions towards the environment,” dugang ni Gonzales.

Gipaabot nga mosaka ang gidaghanon sa basura ug gusto sa DENR 7 nga mapaabot sa publiko ang mensahe nga importante nga maglikay sa paggamit og plastic.