KINSA KAHAY MITIPI NI GABUYA
Way nahibaw-ang hulga ang pamilya ug kahigalaan ni Sr. Inspector Porferio Gabuya, Jr. nga magsilbeng motibo sa pagpatay kaniya niadtong Disyembre 19, Miyerkules sa Guihulngan City, Negros Oriental.
Gihulagway siyang maayong tawo busa wa siyay kontra mao nga naglibog sila.
Matod ni Jennifer Gabuya, 31, kinamaguwangang anak ni Gabuya, nga sapagkakaron wa pa nila gihuna-huna kinsa ang nagpatay sa ilang amahan, mga rebeldeng New People’s Army (NPA) ba o laing grupo.
Apan matod niya nga wa siyay nahuna-hunaang kaaway sa ilang amahan.
“Pwera buyag sa akong papa wala man siyay kontra man kay maayong taw akong papa,” matod pa ni Jennifer sa interview sa Superbalita Cebu.
Ang haya ni Gabuya niabot dinhi sa Sugbo niadtong Biyernes sa kaadlawon, Disyembre 21 ug gihaya sa ilang balay sa Fairview Village, Dakbayan sa Talisay.
“Sa pagkakaron, sa tinuod lang, wala pami nagkaestorya sa among family kon unsa gyod. Amo sa na i-set aside kon unsa nang anger or anything, kay subo pa kaayo among family,” dugang ni Jennifer.
Matod niya nga dul-an na sa 30 ka tuig nga nangalagad ang iyang amahan isip pulis sa Sugbo.
Wa silay nahibaw-an nga duna kini gikaaway o nagdumot niini.
Si Jennifer niingon nga buotan ang iyang amahan nilang pito ka mga magsuon ug sa ilang inahan.
Si Nestor Quirobin, 57, kumpare ni Gabuya, niingon nga wa siya magdahom nga patyon nga linuog ang iyang higala.
“Friendly kaayo. Sige mig imbitaron niya kon adunay okasyon diri sa ilaha ug dili hambog na pagka kumpare, idol ni nako siya,” subay ni Quirobin.
Ang lawas ni Gabuya ibalhin sa Camp Sergio Osmeña sa Osmeña blvd sa Disyembre 26 ug ilubong sa Disyembre 29.
Anha kini hayaon sa St. Ignatius Chapel.
Sa buhi pa kini, naanad ilang pamilya nga sa balay mag Pasko mao nga sa Disyembre 26 pa nila ipabalhin ang lawas.
“Kay gusto man g’yod ni niya na magpasko ming tanan diri sa balay,” matod ni Jennifer.
Ilubong kini karong Disyembre 29 sa Queen City Memorial Garden sa Cebu City. /