Way NPA nakit-an sa midnorth Cebu: pulis, Centcom

Daling gipasusi sa Cebu Provincial Police Office ang nadawat nga report nga adunay armadong kalalakin-an nga nasigpatan sa mga bukirang barangay sa mga lungsod sa Tabuelan, Tuburan, Asturias ug Balamban nga gipangdudahan nga mga sakop sa New Peoples Army (NPA).

Matod ni Sr. Insp. Alejandro Batobalonos sa Provincial Intelligence Branch nga iyang gipanawgan ang mga police station sa maong mga lungsod, apan nasuta nga wa makadawat og taho ang mga pulis.

Giangkon sa kapulisan nga nakadawat usab silag report labot sa giingong mga armado, apan di kompirmado.

“Among gipanawgan ang mga police station sa mid-north, wala man daw sila makadawat og report nga tinuod na,” matod ni Batobalonos.

Kini usab ang pamahayag sa Central Command nga gipasubay na usab sa ilang intelligence nga nagbase sa probinsya sa Sugbo.

Si Army Capt. Joe Patrick Martinez mitug-an sa Superbalita Cebu nga wa pa silay impormasyon nga aduna nasigpatan nga mga armado sa tulo ka mga lungsod sa mid-north area.

Gipahugtan na sa Police Regional Office 7 ang ilang pagbantay sa matag police station nunot sa posibling kinalit nga pagpangatake sa mga NPA sa Negros Oriental ug sa isla sa Sugbo nunot sa ilang ika-50 nga anibersaryo.

ENGKWENTRO

Samtang usa ang patay ug duha ang samdan sa mga sundawo sa engkwentro tali sa mga rebeldeng NPA sa Las Navas, Northern Samar.

Sa wa pa ang pinusilay, gisulong sa mga rebelde ang usa ka kampo sa militar sa lungsod sa Sabado sa buntag, Disyembre 22.

Human sa pangatake, nisibat ang mga rebelde apan nakasugat nila ang laing grupo sa kasundalohan sa Barangay Capotoan.

Usa ka sundawo ang patay ug duha ang samdan sa pinusilay.

Base sa report sa 20th Infantry Battalion sa Philippine Army, ang ilang Community Support Program Team nagpatrolya aron masiguro nga luwas sa pagpanghudlat sa komunistang NPA ang lugar.

Atol sa pagpatrolya, nakasugat sa militar ang mga nisibat nga NPA nga gikan nangatake ug nahitabo ang kapin usa ka oras nga pinusilay.

Nagbuwag buwag ang mga NPA ug nisibat sa nagkalain laing direksyon.

Usa ka sundawo ang patay nga giilang si Private First Class Alvin Avila ug duha ang samdan nga sila si Private Ivan Anthony Ignao ug Private Michael Ocasia.

Narekober human sa engkwentro ang gamit panggiyera ug improvised explosive device (IED) nga gituhoang gigamit pagpangatake og kampo sa militar.

Gidayeg ni 20th IB Commader, Lt. Col. Noly Lapizar ang iyang tropa sa pagprotekta sa katawhan ug gikondena ang gihimo sa NPA.