Police visibility

Maanindot ang konsepto ni Mandaue City police director Sr. Supt. Julian Entoma sa pagpasakay og mga pulis sa PUJ nga ilang mapilian nga sakyan. Buddy system kun tagduha ka mga pulis ang magkuyog unya sundan pa og sakyanan nila nga duna gihapoy mga pulis nga magsakay.

Apan mas nindot tingali kon dunay permanenteng police visibility sa kadalanan 24 oras. Gawas nga dunay nagpatrolya, dunay mga pulis nga makit-an sa matag eskina. Wa na kinahanglana pang sakyan sa mga pulis ang PUJ nga ilang mapilian kay ang police visibility igo na kaayong makapahadlok sa mga kriminal.

Kana bitawng magsige og checkpoint ang mga pulis, magbutang ini sa bisan asa nga dapit ug di magtultol ang oras, mominos og maayo ang mga krimen sa kadalanan.

Sa dakbayan sa Sugbo, sukad giestrikto na ni Cebu City police director Sr. Supt. Royina Garma ang pagbutang og mga pulis sa mga outpost sa downtown sa dakbayan sa Sugbo, miminos og maayo ang mga krimen.

Bisan sa lawom nang kagabhion, makakita ka gihapon og mga pulis nga naglingkod sa mga outpost sa downtown.

Mas epektibo ni kay sa random nga mga pagsakay sa mga PUJ, apan limitado ang mga oras sa karsada. Ang labing maayo nga butangan og mga pulis sa karsada nga mas taas ang mga oras. Ilhon usab ang mga dapit nga mas daghan og mga krimen ug patrolyahan ang mga lugar nga sagad mahitaboan niini.

Lahi man gud kaniadto nga mingaw na ang mga dan sa lawom nang kagabhion. Apan karon nga naa nay gatusan ka call centers nga nangempleyo og liboan ka mga trabahante, ang 24 oras nga police visibility gikinahanglan kaayo.

Ang mga tawo usab di na mahadlok kon makakita og mga pulis sa karsada. Kompyansa na sila samtang ang mga kriminal magpanagana, labinag dunay mga sakyanan nga magkidlap ang mga suga.