Miss Universe nga lumad Pinay
Tuguti nga mosulod una ako sa teritoryo nila ni Troy Ciar ug Sir Roger Serna sa kalibutan sa show business. Atong hisgutan ang bag-o lang gipahigayon nga Miss Universe 2018 nga diin ang contestant sa Pilipinas, Catriona Gray, ang gi-deklarar nga Miss Universe. Kining maong prestihiyosong indigay sa talento ug kaanyag natukod niadtong 1952.
Dili kaayo ako ‘proud’ o ma-ingon tang punga nga dako nakong garbo ang kada-ugan karon ni Catriona Gray. Kay ngano man? Dili man gud siya usa ka tinud-anay o lumad nga Filipina. Aduna siyay dugong langiyaw kay Australian national ang iyang amahan samtang Filipina ang iyang inahan. Tiaw ba nimo kanang ang taga Queensland, Australia mi-angkon man usab niya nga usa ka Australian national kay didto man siya natawo ug nagdako. Bisan tuod nga ang Pilipinas maoy iyang gi-presentahan apan lumad man usab siya sa Queensland, Australia.
Bisan kadto si Pia Wurtzbach nga midaog sa 2015, dili usab ako ‘sold out’ kay lagi may dugong langiyaw man. May dugong German si Pia kay iyang amahan German national. Sila si Gloria Diaz (1969 Miss Universe) ug Margie Moran (1973) maoy angay kaayong ipasigarbo kay lumad nga mga Fillipina.
Nganong dili man kita magpadala og contestant nga Filipina gyud og kadugo ug dili rasa o mix ang dugo og nationality? Pagkadaghan natong mapilian. Kana diay’ng uban nga nangapil og mga beauty contest? Ayaw lang pod nang mga nitibo. Kay kon lumad Filipina gyud maoy modaug, siguradong mapasigarbuhon gyud ta.
TRANSGENDER
Usa sa mga kontrobersiya nga naghamok usab sa Miss Universe karong tuiga gumikan sa pagtugot sa mga organizers nga maka-apil ang usa ka transgender. O kanang mahuyang god nga sakop sa lesbian, gay, bi-sexual and transgender (LGBT) community. Ang kandidata sa Spain nga ang super model nga si Angelica Ponce gipa-apil. Ngano god tawon nga misugot sila nga ‘lalaki’ man siyang gipakatawo? Samtang aduna nay ‘equality’ ug aksiptado na sila sa katilingban, apan di para nila ang titulo. Pwede diay nang Miss Universe unya lalaki? Maghimo lang unta ta indigay nga para nila. Miss Gay Universe. Di ba?