Forgiveness
Mihana kog lakaw kay gusto ko na lang biyaan si Jino. Apan gikuptan niya ang akong bukton. “Clarissa, wait.”
Wa ko modayog lakaw. Nagkupot gihapon si Jino sa akong bukton, wa ko kuhaa ang akong bukton nga iyang gikuptan. Nabatyagan ko ang kainit sa palad ni Jino. Kanindot na gyung gakson ni Jino, uy, tungod sa kamingaw ko niya? Apan nagpugong lang gyud ko sa akong kaugalingon. Nagtuo ko nga wa na siyay love nako ug tingali duna na siyay girlfriend sa London.
“Jin, nganong nia ka?” “Tungod nimo, Clarissa.” “Tungod nako? Naiknat ang akong kilay. Giyam-iran ko si Jino. “Well, makig-estorya ka nako aron duna tay formal break-up, di ba?”
Mhinay kog lakaw biya sa simbahan. Miabay paglakaw si Jino nako. Iyang gikuptan ang usa ko ka kamot. Giwakli ko ang kamot ni Jino. Mihunong kog lakaw ug giatubang ko si Jino. Wakoy maayong buot niya.
“Now, tell me the truth, Jino. Nganong nia ka, nganong di ka na nako makontak, ug kon nganong wa ka mananghid nako sa imong paglarga paingon sa London?”
Kaayo na gyung ihilak, uy, tungod sa kahiubos ko kang Jino.
“Look, paminaw nako, Clar, bahala kag di ka motuo nako. Wa ko makapananghid nimo kay kalit kaayo ang pagkuha ni Mama nako. Nahiabot siyag gabii ug pagka kadlawon namiya na mi dinhi sa Cebu. Wa ko makakontak nimo kay lowbat ko, ug nag-brownout niadtong tungora. Gisulug-sulog gyud ko sa higayon, kay pag-abot namo sa Manila gi-esnats ang akong selpon, mahalon baya to. Wa ko makasag-ulo sa imong number maong wa gyud tika makontak bisag didto na ko sa London. Maong nia ko karon sa Cebu, wa na ko makaagwanta sa kamingaw nimo.”
Mitan-aw kog dugay kang Jino. Naglisod ko pagdesisyon kon tuhoan ko ba siya. Ambot ba sab, uy, kon tinuod man ang iyang giingon, apan lisod man gyud katuhoan. Mipadayon kog lakaw. “Ambot, Jin, kon motuo ba ko nimo.”
“Kanus-a ba ko namakak nimo, Clarissa? Since sa atong panag-uyab, bisag kausa wa gyud ko namakak nimo, di ba?”
Nahilom ko. Gihunahuna ko pag-ayo ang gisulti ni Jino kon nakapamakak ba siya nako sukad nga nagkarelasyon mi.
(SUMPAYAN)