NAGSUGOD SA KASUKO, NA-DEVELOP SA GUGMA
Sa unang pipila ka mga higayon nga nagkakita sila si Hinky Padin ug Jovelyn Satinitigan-Padin niadtong 2009, gibadlong ang babaye sa lalake tungod sa pagkasabaan niini. Ang duha pulos mga kanhi working student sa University of the Visayas main campus apan sa Gullas College of Medicine sila nadestino sa Banilad, si Jovelyn sa Chemistry laboratory samtang sa bookstore si Hinky.
Mag-adtuan sa bookstore si Jovelyn kay atua madestino ang iyang suod nga higala.
“Gibadlong ko niya, nasuko siya nako kay sabaan kuno ko. Mura mig enemy kay badlungon ko niya. Pero ako ra diay nagdibdib ato kay wala ra to niya. Unya nisulti akong friend nga ganahan siya (Hinky) nako,” saysay ni Jovelyn nga may kilig nga pagbati.
Sila magkakuyog og pauli sakay sa school bus padung sa dakbayan sa Carcar, ang dalaga nagpuyo sa Barangay Can-asujan samtang taga Barangay Napo si Hinky.
Dunay mga higayon nga mokawat og tan-aw si Hinky ni Jovelyn hangtod nga kini nangulitawo niini.
Gisugot sa dalaga ang ulitawo niadtong Abril 27, 2010, dihang namisita kini sa ilang
boarding house pasado alas 9 sa gabii, atol usab nga takdul ang buwan.
Sumala ni Jovelyn, ikaunom sa pito ka magsuon, nga niagi og kalisod ang ilang relasyon ni Hinky, ikaduha sa ikatulo nga magsuon, kay estrikto ang iyang mga maguwang labi na ang iyang igsuon nga pulis.
Bisan sa mga pagsuway sa ilang relasyon, padayon kini ninglig-on hangtod nga nitapos sila og tungha sa kolehiyo.
Si Jovelyn sa kursong Mass Communication samtang Marine Engineering ang hinigugma.
Bisan kon nagkalagyo ang duha dihang nanarbaho sa barko sa abroad si Hinky, nagpabilin ang ilang pagsalig, pagsinabtanay ug paghigugmaay sa usag-usa pinaagi sa regular nga komunikasyon gamit ang bag-ong teknolohiya, hangtod nga nahitabo ang proposal niadtong Agusto 2016.
Nakita ug nabati ni Jovelyn ang dakong gugma sa bana dihang gitinuod niini ang saad nga magpakasal silang duha inig kanaug niini sa barko diin nilahos kini sa ilang balay aron mamaye.
“Nihilak siya sa atubangan sa akong tatay kay pagbalik niya sa amoa, wala siya’y kuyog nga parent. Mao to niingon ko nga dili na lang ta madayon og kasal oi unya nihilak siya. Nakaingon ko, hala seryuso jud diay siya,” dugang sugilon ni Jovelyn, tigbalita sa sibyaanang dyRC Radio Cebu.
Ang walo ka tuig nga relasyon naselyohan human nagbinayloay og “Yes, I do” sila si Hinky ug Jovelyn sa St. Catherine of Alexandria Church sa Carcar niadtong Nobiyembre 17, 2018.
Ang espesyal nga kalihokan gisaksihan sa ilang mga minahal sa kinabuhi, mga higala ug mga bisita nga nahimong kabahin sa ilang mga kinabuhi ug gugma.