LAKERS GIAGAK NA SAB SA HARI
Nagpakatap na sab og triple-double si LeBron “King” James aron agakon ang host Los Angeles Lakers ngadto sa 112-104 nga kadaugan batok sa New Orleans Pelicans kagahapon sa National Basketball Association (NBA).
Ang four-time MVP nimugna og 22 puntos, 14 assists ug 12 rebounds aron irehistro ang iyang ikatulong triple-double isip usa ka Laker ug ika-76 sa kinatibuk-an.
Ang Lakers, nga ningpaugot sa ilang paggunit sa ikaupat nga dapit sa Western Conference dala ang 19-13 nga rekord, nakadawat sab og 23 puntos gikan kang Kyle Kuzma, 18 puntos gikan ni Brandon Ingram.
Ang Pelicans, nga nakatilaw sa ikatulo nilang sunodsunod nga kapildihan nga nakapahagsa sa ilang rekord ngadto sa 15-18, gipangulohan ni Anthony Davis pinaagi sa iyang 30 puntos ug 20 rebounds samtang nidugang og 21 puntos si Julius Randle.
Mao kini ang labing unang higayon nga nagparang sulod sa korte sila si James ug Davis gikan niadtong gipabuhagay ni James ang iyang panghinaot nga unta kuhaon sa Lakers si Davis.
Sa wala pa nagsugod ang duwa, gitataw nang daan ni New Orleans coach Alvin Gentry nga wala sila’y plano buhian nila si Davis alang sa Lakers o sa bisan unsa na mga puwersa.
Ning kombatiha, mibalik na’g duwa ang pambatong
pointguard sa Lakers nga si Rajon Rondo ug nitampo kini’g walo ka mga puntos ug siyam ka assists.
Sulod sab sa 17 ka mga duwa wala nakapakita og aksyon si Rondo gumikan kay naangol ang tiil niini.