10 ANYOS GIDUNGGAB SA PAPA

GISABAAN SA PAGPANGAYOG PAGKAON; MGA SILINGAN MAOY NAGBUHI NILA

Gidunggab sa iyang amahan ang 10 anyos nga anak babaye pasado alas 11 sa buntag, Enero 4, sa sitio Plus, Barangay Inayawan, siyudad sa Sugbo.

Ang bata nakaangkon og samad dinunggaban sa dughan apan di kaayo lawom hinungdan nga naa na siya luwas nga kahimtang.

Dali siya nga gitabang sa mga crew sa ambulansya sa Barangay Inayawan.

Naabtan pa sa mga barangay tanod ang amahan nga nagsabak sa biktima nga nagkadugo na ang dughan mao nga ila dayon nga gidala sa barangay aron ikustodiya ang amahan una gitugyan ngadto sa Pardo Police Station.

Gihimakak sa suspek nga siya ang nidunggab sa bata, apan mga silingan nitudlo kaniya nga maoy nidunggab.

Iyang gipasangil ngadto sa iyang anak nga naunay kini sa kutsilyo samtang nagduwa.

Basi sa sulti sa silingan nga si Francisca Portalio, 64, nga ang amahan adunay sakit sa paghuna-huna ug mo tukartukar kon di makakaon.

“Naagi na kini og kulong sa una tungod sa iyang sakit sa panghuna-huna,” matod ni Portalio.

Kon di sul-an, but-an kini, matod ni Portalio.

Sa wa pa mahitabo ang pangpangdunggab, niduol kang Portalio ang bata ug nisulti nga ang iyang amahan nabuang na sab.

Kagahapon sa alas 11 sa buntag, nabantayan kini sa iyang silingan nga nagsige og gawasgawas nga adunay nakabutang nga kutsilyo sa iyang hawakan.

“Sa iyang katulong sigeg balik-balik og gawas, sa pagsulod niya sa iyang balay, aduna nami nadunggan nga siyagit sa bata nga nagpakiluoy sa iyang amahan,” dugang ni Portalio

Dali nilang gipahibawo ang mga barangay official ug gisulod ang pinuy-anan.

Si Richard Jimenez, 47, barangay tanod nga apil sa pagresponde, niingon nga Ilang namatikdan na adunay dugo ang bata sa walang bahin sa dughan hinungdan na ilang gidali og dakop ang suspek.

“Kon wala pami moabot ato, basin iya nasad tong dunggabon utro iyang anak kay nagunit paman og kutsilyo. Unya iyang gisabak iyang anak,” matod ni Jimenez

Gikuha gilayon nila ang bata, kinsa samdan sa dughan, ibabaw sa tutoy.

Apan bisan pa hitabo, ang bata nihangyo sa mga awtoridad nga di prisuhon ang iyang amahan.

Ang amahan niangkon nga iyang nadunggaban ang bata kay gisabaan siya sa pagsigeg pangayog pagkaon. GIBUHI SA MGA SILINGAN

Matod ni Vincie Monterde, barangay administrator sa Inayawan, nga ang mga silingan ang magpuli-puli sa pagpakaon sa amahan ug anak.

Ang amahan gibiyaan sa iyang asawa, kinsa duna nay kapuyo sa Barangay Tanke, Dakbayan sa Talisay.

Duna silay upat ka mga anak, diin ang duha duna nay kapuyo samtang ang usa nagpuyo uban sa inahan.

Ang kamanghuran maoy nahabilin uban sa amahan.

Gikompirmar ni Monterde nga drug user ang amahan, kinsa niundang na unta sa bisyo, apan nibalik tungod sa kaguol sa pagbiya sa asawa.

“Niingon ang mga silingan ani niya nga buotan kuno ni, naaborido lang gyud to, naboang man gud ni tungod sa adikadik ba, pagka depress niya nga gibiyaan sa asawa mosuyop na pud,” matod ni Monterde.

Ang bata naa na sa social welfare office gi-custody.

Si Chief Insp. Regino Maramag, hepe sa Pardo police station, nagkanayon nga kasamtangan nila nga gibilango ang amahan.

Kon di mopasaka og kaso ang anak o kabanay sa 10 anyos, ila kining buhian.

“Kung mo file og kaso ang bata, tutulongan namin siya. Pero sa ngayon, i custody muna namin dito,” matod ni Maramag.

Nabantayan ni Maramag nga adunay deperensya sa pangisip ang amahan nga angay papahuwayon sa pagkakaron.