■AMBUSH NA SAB:

Mao kini ang awto sa negusyanteng si Giovanni Ruiz Collamat, taga Barangay Alang-Alang, Dakbayan sa Mandaue, kinsa gi-ambush sa may dan W. Seno, Barangay Guizo, mga alas 11 pasado sa gabii sa Huwebes, Enero 3. Apan namatay si Collamat mga ala 1 pasado sa kaadlawon sa Biyernes, Enero 4, sud sa ospital.

Negusyante nga nagmaneho sa iyang sakyanan gikan sa buwangan sa dakbayan sa Sugbo gipusil patay sa duha ka mga tawo nga nagangkasay sa motorsiklo pasado alas 11, Huwebes sa gabii, Enero 3.

Apan namatay sud sa tambalanan si Giovanni Ruiz Collamat, taga barangay Alangalang, dakbayan sa Mandaue, mga alas 1:40 sa kaadlawon sa Biyernes, Enero 4.

Si Collamat, matod sa kapulisan tag-iya og motor shop ug barber shop.

Natusak siya sa mga bala nga klarong giseguradong mapatay siya.

Gitug-an ni PO3 Angelo Arnaiz, desk officer sa Poblacion police station sa Mandaue City Police Office nga gikan namuwang sa Barangay Tejero, dakbayan sa Sugbo, si Collamat luwan sa iyang blue nga awto.

Sa dihang padung na unta kini mopauli, sa iyang paghiagi sa may dan W. Seno sa Barangay Guizo, dakbayan sa Mandaue, kalit lang duha ka mga lalake nga nagmotorsiklo nitupad sa may driver’s side sa sakyanan.

Ang backrider sa motor nipusil makadaghan kang Collamat dayon sibat.

Naigo sa iyang nawong ug ubang parte sa lawas si Collamat.

Dali siyang gitabang sa medical team sa Emergency Rescue Unit Foundation (Eruf), ug gidala sa pribado nga tambalanan sa dakbayan sa Sugbo. Gideklarar siya nga patay ala 1:40 sa kadlawon.

Walo ka kabhang sa mga bala ug duha ka slug sa wa pa masuta nga armas ang nakuha sa Scene of the Crime Operatives (Soco).

Matod ni Arnaiz nga base sa pakisusi sa pamilya sa biktima, tigsugal kini sa mga buwangan sa dakbayan sa Sugbo ug syudad sa Mandaue, apan wa silay nasuta nga kontra ni Collamat.