Loot mipakita na sa Daanbantayan
Human sa dul-an duha ka buwan nga pagbakasyon sa Estados Unidos, opisyal nang mibalik sa iyang buhatan si Daanbantayan Mayor Vicente Loot niadtong Biyernes, Enero 4, 2019.
Ang mayor mainiton nga gihangop sa mga opisyal ug empleyado sa lokal nga kagamhanan sa Daanbantayan uban sa mga opisyal sa barangay ug Sangguniang Kabataan dihang niabot kini sa munisipyo.
Si Bise Mayor Gilbert Arrabis nikompirmar sa SunStar Cebu nga nahibalik na sa munisipyo ang mayor.
Matod niya, nagpadala og suwat niya si Loot ug kang Gobernador Hilario Davide III ug nipahibawo sa iyang pagbalik sa opisina.
Sa opisyal nga Facebook page sa lungsod nga Municipality of Daanbantayan, kini nagkanayon, “Now that Mayor Loot is back in office, we are one as we continue to aim higher for a more progressive Daanbantayan and empowered people. Welcome back, Mayor!”
Sa post sa iyang Facebook page, ang mayor namahayag nga tungod sa iyang gugma sa katawhan nibalik kini ug sa iyang pagbalik padayon sila sa pagkab-ot sa ilang mga damgo.
“Gugma ko, gugma ninyo, inubanan sa inyong kinasingkasing ug hugot nga suporta--kalampusan nato!” tipik sa maong post,” tipik sa maong post sa mayor sa iyang Facebook page.
Si Loot, nangayo og usa ka buwan nga lugway sa iyang giingong pagbakasyon sa Estados Unidos dihang nisuwat kini kang Davide niadtong Disyembre 5.
Rason niya nga gusto niya makauban ang iyang mga igsuon nga tua na magbase sa Amerika nga dungan nila sugaton ang Pasko ug Bag-ong Tuig.
Hangtod pa unta sa Enero 17, 2019 ang giaprobahan nga lugway ni Davide human mapupos ang vacation leave sa mayor niadtong Disyembre 18.
Sud na sa dul-an walo ka buwan nga wa makita sa kadaghanan sa katawhan sa Daanbantayan ang mayor human kini banhigi ug ang mga miyembro sa iyang pamilya sa armadong mga tawo, usa ka adlaw sa di pa ang eleksyon sa barangay sa Mayo 2018.
Si Loot nakontrobersiyal human kini makadaghan ka higayon nga ginganlan ni Presidente Rodrigo Duterte nga giingong usa sa mga protector sa drug lord sa nasod. /