Kapulisan ready na sa Sinulog: Sinas
Mas hugot nga siguridad ang ipatuman sa Police Regional Office 7 (PRO) 7 atol sa Sinulog human sa pagpamomba sa dakbayan sa Cotabato sa miaging mga adlaw.
Sugod Enero 9 atol sa Walk with Jesus, isaka na sa Police Regional Office (PRO) 7 ang ilang alert status ngadto sa full alert, diin tanang pulis gimandoan nga on standby sa ilang mga police station ug wa nay tugotan nga maka-leave sa ilang trabaho.
Kini nagpasabot nga di lang ang kapulisan sa syudad sa Sugbo ang mabantay, lakip na ang mga silingang probinsya sama sa Bohol, Siquijor, Negros Oriental ug probinsya sa Sugbo.
Gihulagway ni PRO 7 Director Chief Supt. Debold Sinas nga andam na sila sa paghatag sa siguridad gikan sa seaborne procession hangtod na sa adlaw sa Sinulog grand parade.
Tungod sa pagpamomba sa Cotabato niadtong bisperas sa Bag-ong Tuig, diin duha ang namatay ug labing minos 30 ang nangaangol, hugot karon ang monitoring sa PRO-7 inabagan sa tanang intelligence unit sa gobyerno.
Giklaro hinuon ni Sinas nga sa pagkakaron wa pa silay nadawat nga hulga, apan bisan pa niini wa sila mokompyansa.
Sama sa unang nasabotan sa joint security conference, girekomendar sa PRO-7 ngadto sa National Telecommunication Commissions (NTC) 7 , nga pawngon ang tanang signal sa cellphone atol sa seaborne hangtod na sa grand parade.
Apan giklaro ni Sinas nga kadto lamang rota sa parade ug sa procession ang angay nga pagngon ug sud lang sa duha ka adlaw .
“Ang tawag ato is sectoral jamming, kon asa na ang head didto lang siya i-jajam. Thats only two days, the solemn procession and the Sinulog grand parade,” matod ni Sinas.
Gipasalig sa kapulisan nga aduna silay igong kagamitan sa ilang komonikasyon aron ma momonitor ang lihok sa mga tawo sama sa mga hand held radio.
Liboan na usab ka mga police ug force multipliers ang ipakatap sa kadalanan.
Bantayan usab nila ang mga mangunguot ug mangingilad.
Mao na kini ang mabantayan ni Cebu City police chief Sr. Supt. Royina Garma diin kadtong mga dayo nga mga kriminal,kon asa ang mga dagkong fiesta, modugok usab sila aron mangawat.
Adunay mga hulagway ang CCPO niadtong nangadakpan na kaniadto nga maoy basehan unya sa pag monitor ug makig alayon pa sila sa ilang counterpart sa Mindanao ug sa kaulohan aron magpatabang sa pag bantay. /