Street party idili sa adlaw sa Sinulog: hepe

Mga business establishment sa dakbayan sa Mandaue giawhag ni Mandaue City Police Office Director, Julian Entoma, sa di pagpahigayon og street party sa panahon sa Sinulog.

Samtang paghatag og security permit, first-come, first-serve basis, diin usa lang ka establisemento ang tugtan sa matag gabii.

Mahimong maka-street party gikan sa Enero 11-17, apan sa Enero 18-20, higpit kining gidili, matod ni Entoma.

Apan alang kaniya, mas maayong way street party aron kalikayan ang kagubot.

Sa naobserbaran sa pipila na ka tuig, nga bisan kon sa dakbayan sa Sugbo ang pagsaulog sa kapistahan sa Sr. Sto. Nino, apan ang pagdagsa sa mga tawo aron sa pagsaulog sa Sinulog moabot sa dakbayan sa Mandaue.

Gani pipila ka mga balay patigayon sa syudad sa Mandaue ang mohimo’g nagkadaiyang klase sa party.

Apan karong Sinulog, rekomendasyon sa kapulisan sa MCPO, nga di na lang unta mag-street party.

First-come-first-serve basis usab ang paghatag nila og security permit alang sa mga establisemento nga buot mopahigayon og party sud sa ilang compound sugod karong Enero 11 ngadto sa 17.

Usa lang matag gabii ang hatagan nila og permit, kini aron matutukan gyud sa kapulisan.

Sa maong permit, nagpasabot kini nga adunay i-detail nga mga pulis sa lugar nga adunay party, gawas sa security personnel sa establisemento.

“Kon mohimo sila og nightly affair, pagsugod pa lang sa nobenaryo, be it, pwede pa namo mahatagan, di lang namo gusto masabayan ang sa Traslacion hangtud na sa Sinulog grand parade. Pwede ra mi mo-approve sa 1st night til 7th night. Mas okay naay indoor. Gi-discourage namo ang street party, kay sa miagi gud amo nakita, dinhi sa Mandaue nga naay street party, dire nuon nakakuha og mga Ecstasy,” gipasabot ni Entoma.

Di na usab sila mohatag og permit sa Enero 18 hangtud sa 20, nga mao ang mga adlaw sa kasaulogan sa pyesta.

Ang security permit ang usa sa kinahanglanon aron usab makakuha ang usa ka establisemento og mayor’s permit alang sa pagpahigayon og kalihukan atol sa Sinulog.

Sa miaging tuig nga Sinulog, tulo ka mga balay patigayon sa Mandaue City ang napasirad-an human nihimo og mga party bisan way pagtugot sa mayor.