No standing policy
Gipahibawo sa Land Transportation Franchise and Regulatory Board (LTFRB) ug sa Land Transportation Office (LTO) nga hugot na karon nilang ipatuman ang no standing policy ngadto sa mga bus de pasahero-an. Ang masakpan pamultahon og P5,000. Si Eduardo Montealto Jr., ang regional director sa LTFRB 7, mibutyag nga dili na nila tugotan ug estrikto nilang idili ang pagpabarog og pasahero niadtong mga bus nga nagbiyahi-an og 15 kilometros pataas kay delikado kini makamugna og aksidente.
Ubos sa Republic Act 4136 kun Land Transportation and Traffic Code ug Joint Administrative Order ( JAO) 2014-01 gidili ang overloading sa mga pampublikong sakyanan sama sa bus.
Atong gihangop kining tinguha sa LTFRB ug sa LTO kay tinuod man sab nga gawas sa kahapsay ug kaharuhay na unya sa biyahe sa pasahero, dali na usab sila nga maabot sa tagsatagsa ka destinasyon.
Pero daghan usab nga mga pasahero ang moprotesta niini ilabi na kadtong anaa ra sa kadalanan mag-atang og sakyanan.
Kinsa na man unya ang mopasakay kanila, ilabi na og peak hours kay mahadlok na man nga dakpon ang mga drivers?
Dako ang posibilidad nga daghang mga empleyado nga permi na unyang ma-late sa ilang tagsatagsa ka trabaho. Sa laktod nga pagkasulti, sila may unang maapektohan niini.
Di ikalimod nga kuwang ta sa pampublikong bus depasaheroan niining panahona. Busa nganong dili man hatagan og konsiderasyon ang sugyot ni Julie Flores, presidente sa Cebu Provincial Bus and Mini Bus Operators, nga tugotan apan limitahan lang ang mga pasahero nga magbarog sa bus.
Sagad sa mga disgrasya sa kadalanan ang pagpakusog ug pagpataka og padagan sa mga drivers maoy usa sa mga hinungdan, dili ang ka puno sa pasahero.
Kini mao untay angay hugtan pagbantay sa LTO.