Kisaw sa third district
Tulo ang nanagan pagka-kongresista sa third district sila si kanhi Rep. Pablo John Garcia sa One Cebu-PDP-Laban, Toledo Mayor Sonny Osmeña nga independente ug kanhi Pinamungajan Mayor Gay Yapha sa LP. Si Pablo John maoy nakapasemento sa kadalanan nga nagliyok sa distrito. Nadugangan ang paglambo ni Rep. Gwen Garcia nga karon mibalik pagdagan og gobernador nga gikalipay sa mga Sugboanon gumikan sa daghang mga nahimo. Si Sonny nga gikang nagkongresista wala makatandog sa problema sa maong kadalanan. Kay wala sab makadaog pagbalik og senador nagmayor sa Toledo apan iyang nasugatan ang usa ka tuig nga pagkasuspenso gumikan sa grave abuse of authority sa wala paghatag og bahin sa real property tax sa Daanglungsod nga 17.7M pesos sa 2014. Si Gay napukan sa pagka-mayor sa Pinamungajan ug napakyas usab sa dihang milansar og kongresista. Ang sukdanan god sa kadaugan sa distrito mag-agad sa suporta sa mayor, kapitan ug katawhan.
Sa Tuburan mikunop ang liderato sa mga incumbent diin tingog sa mga tawo nag-indorso ni Daphne Lagon nga nahalinya ni Pablo John. Sa Asturias si Mayor Anto Pintor ug mga kapitan miduyog ni Pablo John. Sa Balamban dili malalis ang epiktibong liderato sa Alex Binghay-Alfie Binghay tandem nga hugot nga nagsuporta ni Pablo John. Sa Toledo gibilin ni Sonny si Joy Perales kansang kaatbang maoy respopnsabli nga nahimo silang opisyal si kanhi Mayor Daydee Epinosa-Zambo nga mipares kaniadto sa iyang amahan kanhi Mayor Rudy Espinosa nga maoy nakatunol og daghang mihuras sa Toledo diin naa sila mikuyog sa liderato ni Pablo John. Sa Pinamungajan wala na makabalik ang mga Yapha human mailog ang lungsod ni Mayor Glenn Baricuatro nga gisuporatahan sa 22 ka mga kapitan, 132 ka konsehal ug 23 ka SK nunot sa ilang pagsuporta ni Pablo John. Sa Aloguinsan ang pamilyang Moreno nga nagdumala sulod sa daghang katuigan mihabig ni Pablo John. Samtang sa Barili si Mayor Marlon Garcia igsoon ni Pablo John. Kisaw sa politika sa third district natataw ning sayo pa nga nagsangkiig ang politikanhong sitwasyon nila ni Sonny ug Gay. Ingon og naglatay sa usa ka lugas lanot.
Dungog sa pamunoan sa mga Binghay nga anag Balamban maoy labing adunahan 853.6M pesos nga assets nagsunod ang Minglanilla ug Consolacion basi sa COA reports. Ikaduha nga Most Competitive Municipality sunod sa Consolacion iwit ang Oslob, Santander ug Samboan basi sa National Competitive Council of the Philippines nga nagsukad sa economic dynamism, govt. efficiency, infrastructure ug resiliency. Sa mauswagong pagdumala sa mga Binghay ang Balamban nagbugsay padulong sa unahan ug nalantawan nga mahimong siyudad.