Trapiko nag-unang problema
Gawas sa kisaw sa politika ug ekonomiya akong napanlantawan nga magpabiling hilisgutanan ang kasikas sa karsada alang ning bagong tuig. Mao ni gitawag nga way pagkapawong nga isyu nga atong sagubangon matag adlaw. Bisan ang mga yanong molopyo nagping-it di lang tungod sa pagsulbong sa presyo sa mga palaliton apil na ang ang kahinay sa bul-og sa trapiko nga naka apekto sa ilang panginabuhi. Nag-una ang mga drayber sa publikong sakyanan. Tungod sa ka trapik sa ilang ruta nibahar ang ilang kita. Kong nagping-it ang mga pasahero samot na kining maong mga drayber. Pananglitan sa mga drayber o taxi. Molihok man tuod ang metro bisan kong trapik kaayo pero mas dako unta og bentaha nga mahatod na dayon nila sa ilang distinasyon ang ilang pasahero. Mao sab sa dyip ug bus.Maayo unta kong natanggong sa trapik moundang sab og habhab sa krudo o gasolina ang ilang gimaneho. Daghan ang nag-atang nga mahingpit na ang pagkawot sa usa ka bahin sa Natalio Bacalso Ave. aron mobalik sa normal ang dagan sa trapiko ug mobalik kadasig ang nagka gidlay nga dagan sa patigayon sa maong dapit. Pero unsay kasigurohan nga way laing pagpanira sa karsada nga mahitabo sa ubang bahin sa siyudad ug sikbit nga mga dakbayan o kalungsoran tungod kay may mga proyekto nga ipatuman. Sa record sa sa Land Transportation Office moabot sa 554, 472 ka sakyanan ang narehistro niadtong tuig 2016 dinhi sa atong rehiyon. Pagka 2017 nisaka kini sa 598,668 ang maong gidaghanon. Wa pa ni labot sa record sa niaging tuig. Kining maong gidaghanon dako kaayo og natampo sa kahuot sa atong mga karsada. Pun-an pa sa kakuwang sa disiplina sa ubang drayber siguradong magkamuritsing tag samot niini.
Nakadawat ko positibong reaksiyon sa akong mga silingan sa Barangay Kalunasan ning atong dakbayan labot sa isyu habal habal nga akong gi-asoy dinhi sa nakalabayng tuig. Akong nahisgutan man gud dinhi kining pagdeklarar nga iligal ang operasyon sa Angkas ug habalhabal. Ang pangutana sa akong mga silingan, wa may dyip nga nagruta didto unsa may ilang sakyan? Ang route number 15 tua ra man sa ubos sa may OPRRA nagbiyahe. Ang ibabaw nga bahin Angkas ug habalhabal ra man gyud ang nagserbisyo. Mao sab ni ang problema sa mga tawo nga nagpuyo sa mga dapit nga way biyahe sa pampublikong sakyanan. Balikon nako nga basi sa akong kasinatian di sayon ang magsakay og habalhabal. Usahay maat;an ka og ulan unya dangog ang dalan. May higayon nga nabungkag ang balay sa lampinig sa imong pag-agi kay dasok baya sa ka kahoyan ang among dapit. Sa di pa ipatuman ang balaod unta butangan og ruta kining maong mga dapit.