Kampanya gamit ang ‘panty...’

SuperBalita Cebu - - EDITORYAL - Eddie O. Barrita

Malipayon nga miasoy ang usa ka batang baaye ngadto sa iyang inahan: “Ma, nikatkat ko sa punoan sa bayabas. Nakit-an kong Noy Kulas, atong silingan, nga wa koy panty. Gipakanaog ko ug gihatagan ko niyag P100 para palit panty.”

Pagkadungog sa inahan niini, naghubo siya sa iyang panty ug nikaratil og dagan. Nikatkat sa punoan sa bayabas. Tuod man, nakit-an siya ni Noy Kulas nga wa siyay panty. Mao nga gipakanaog siya ni Noy Kulas.

Apan huyhoy ang iyang abaga sa pag-uli niya sa balay. Maong gipangutana siya sa iyang anak, “Ma, gihatagan sab kang Noy Kulas og P100 para palit panty?” Tubag sa inahan, “Wa, anak. Gihatagan kog P10 para palit og blade.”

Di na kinahanglan pang mokatkat sa punoan sa bayabas kon ang ubang mga kandidato sa umaabot piniliay sa Mayo mosunod sa usa ka kandidato sa pagkakonsehal sa Quezon City nga naghatag og panty nga gimarkahan sa iyang ngan.

Ang Commission on Elections (Comelec) niingon nga wa idili ang pag-imprinta sa mga campaign materials, bisan pa sa underwear, ma panty o ma brief. “Pwede naman,” matod pa ni Comelec Spokesperson Director James Jimenez.

Apan unsay kapuslanan sa campaign material nga i-imprinta sa panty nga matabonan man kini? Ang klarong makabasa mao ra man ang mogamit. Maayo kon ang makadawat sa panty pareha ni Superman nga nagsul-ob sa iyang underwear ibabaw sa sinina.

Si Comelec Commissioner Rowena Guanzon niingon nga kinahanglan nga ang Comelec adunay lagda bahin sa gidili nga campaign materials, ilabi na niadtong hilas ug naghimo sa mga babaye nga mga “sex objects.”

Bitaw, mas maayo mga malikayan nga sa panahon sa kampanya, duna unyay mga babaye nga magwalis sa sayal aron makita ang mga panty nga dunay marka nga Vote for nga sundan sa ngan sa kandidato.

Unya kon sitahon nganong nagwalis sa sayal, moingon lang nga nangampanya sila. Sa pulong pa ni Jimenez sa Comelec, ang mga kandidato mobuhat sa bisan unsa na lang para mailhan ug sa pamasin nga modaog.

Newspapers in Tagalog

Newspapers from Philippines

© PressReader. All rights reserved.