‘Pit Senyor! para sa mga masakiton kini’

Naandan na nga tahas nila ni P02 Marlon Manigos ig P02 Nelmark Ducay matag adlaw ang police visibility sa palibot sa Fuente Osmeña ning atong dakbayan.

Gawas nga igmat silang naniid sa kasikas sa palibot kanunay sila nga nagmonitor sa ilang hand held radio basin may alarma nga gikinahanglan ang ilang presensiya.

Samtang nangape ko sa painitan ni Pedring atubangan sa usa ka medical laboratory akong nasigpitan ang duha ka polis nga may gikaestorya.

Abi nako og gisumbongan sila og alarma. Nagpatultul ra diay kong asang dapita ang ospital diin may pamilya kini nga na-admit.

Sa akong interview sa duha ka polis ilang giasoy nako ang daghan nilang kasinatian sa maong dapit. Sa mga problemang personal nga gosumbong ngadto kanila naglabi ang mahitungod sa panglawas.

May nangutana kong asa magpatabang kay nanginahanglan og dugo. May magbitbit og resita mangutana kong asa ning mga foundation nga sarang makatabang nga mapalit ang mga giresitang tambal. Way sipyat kada adlaw ni nga sitwasyon sa ilang assignment.

Pasyente, resita og bisan unsa nalang basta may kalambigitan sa sakit. Ang maong dapit maoy nahimutangan sa daghang ospital, medical clinic og laboratory mao nga matag adlaw sab magbaha ang mga tawo nga nanginahanglan og tabang pinansiyal.

Alang nila ni P02 Manigos og Ducay ang ila ra gyung mahimo mao ang mainiton nga pag-abi abi niadtong moduol og magpakisayod labit sa posibling sulbad sa ilang problema.

Gani samtang nagtabi mi niabot sa ilang atubangan ang inahan og anak nga nipaambit sa ilang mapait nga kasinatian tungod sa ilang pasyente nga nag-antos sa sakit nga dengue.

“Looy kaayo sila labi na niadtong gikan pa sa probinsiya unya way paryente nga kaduolan dinhi sa siyudad,” sugilon nila nako. Matod nila diha gani construction worker nga ilang gitabangan pagpakaon sud sa pipila ka adlaw kay way ikaplete pagpauli sa Bohol.

Aron makasapi gitabangan sa duha ka polis aron makatrabaho sa usa ka tindahan og pagkaon. Mao nga kong kamo masuroy og usa ka dapit nga naay daghang ospital mao gyud ni hunahunaa. Daghan diha ang mga masulob-on.

Nag guol nang daan kay may pamilya nga naospital, pun-an pa sa problema pagpangita og ikapalit og tambal.

Sa duha ka polis ipadayon ang inyong pagpakig-unong sa mga nanginahanglan. Bisan kong di ni ang kurso nga inyong gieskwelahan pero inyo mang gisunod ang pinitik sa inyong mga kasingkasing, ang Labawng Makagagahum nalang ang mag-igo ninyo.

Subay sa ika 454 ka tuig nga kapistahan ni Senyor Santo Niño atong ilakip sa atong mga petisyon ang mga masakiton.

Sayod tang tanan nga kong may maghambin na gani og balatian ang usa ka sakop sa pamilya kagul-anan ang maghari. Masirisiri pagpangita og kuwarta aron mapada sa ospital. Kong tua na sa ospital ang ipalit na sab og tambal ang problema.

Atong iampo kang Senyor Santo Niño nga iyang ayohon sa ilang gihambin nga balatian kining mga masakiton nga naa karon sa tambalanan og sa ilang panimay.

Sa ilang mga kabanay unta hupayon Niya ang ilang mga kaguol og kabalaka. Dungan sa pagsinggit “Pit Senyor! para sa mga masakiton kini.”