Someone’s waiting for you
(Ikaupat sa pito ka mga gula)
Nagpanglingo na lang ko. Nahimuot gyud ko sa hilom sa duha ko ka suitors nga sa akong paminaw, tinud-anay nga nagmahal nako. Ang nakaparat kay wa ko pa masuta sa akong kasingkasing kon kinsa nilang Randdie ug Royette ang akong gihigugma.
Na, lisod na kon masayop kog pili. Wa ra bay pagbasol nga mag-una. Maayo nang maseguro nako nga ang akong gisugot love gyud nako.
Gisugat mi si Randdie ni Royette. Hinay lang ang among paglakaw kay layulayo pa man ang oras sa tagsa-tagsa namo ka subject anang buntaga. Nindot kaayog smile si Royette nako. Milingi ko kang Randdie nga diha sa akong tapad. As usual, nindot sab siyag pahiyom nako dihang nagkasugat ang among panan-aw. Mihunong mig lakaw ug si Royette diha sa among atubangan.
“Good morning, Daleen.” “Good morning sab, Roy.” “Atong ihatod si Daleen sa iyang klasrom, Royette.”
Igo lang kong mipasiplat kang Randdie. Unya si Royette na sab ang akong gitan-aw samtang mipadayon kog lakaw. Misaka ko sa second floor sa Administration Building diin tua mahimutang ang classroom sa una kong subject aning buntaga. “Sige.”
Abtik kaayo si Royette nga mitapad nako, samtang sa pikas kong kilid diha sab si Randdie.
Humag hatod sa duha ko ka suitors nako, nagpasalamat ko nila, ug misulod na ko sa akong klasrom. “Haaayyy ning gugma!” Hilom kong nakaingon. Miginhawa ko pag-ayo samtang milingkod ko sa naandan ko nang lingkoranan duol sa table sa among propesor. Naglibog gyud ko kon kinsa nilang Randdie ug Royette ang akong sugton. Makalibog gyud, uy, kay pulos sila buotan ug matinud-anon sa ilang pagmahal nako. Aw, ang pinitik ra gyud sa akong kasingkasing ang akong agdon, kon kinsa nilang duha ang akong love.
Pagka gabii, dihang misulod na sila si Mama ug Papa sa ilang kuwarto, ug ang akong manghod nga lalaki misulod na sab sa iyang kuwarto, mikanaog ko ug milingkod sa lingkoranang kawayan ubos sa labong mga mga dahon sa Persian Mango sa among lawn. Naghuwat ko kang Ador aron sugdan na niya ang pagtudlo nako sa paggamit sa gitara ug sa pagkanta.
Ug nakita ko si Ador nga migawas sa iyang kuwarto duol sa garahe nga nagbitbit sa iyang gitara. (SUMPAYAN)