Ka live-in tiguwang

Dear Papa Joe,

Maayong adlaw nimo. Ako diay si Blippi, 26 anyos, taga dinhi sa Cebu City. Ang akong patambagan nimo kabahin sa akong ka live-in partner nga tiguwang, 54 ang edad pero sexy pang tan-awon. Aduna sab siyay igo-igong income.

At first, okay pa kaayo ang among panagtipon. Pero nadugay nausab na man siya, sige na lang mi mag-away kay magsige siyag kuyog-kuyog sa iyang mga barkada nga mga pareho pod niya. Mag-inom sila ug buntag nang maabot. Kon ako siyang sukmatan, mag-away ra mi ug iya na man hinuon kong boyboyon, kwentahan ko niya sa iyang mga nagasto nako. Pero kon moaksyon kog biya sa amo, iya pod kong pugngan, modayog ingon nga maghikog kuno siya. Dihay ka usa nga namutos na gyud ko sa akong mga sinina, nikuha siyag blade ug gihiwaan gamay iyang bukton.

Wala na gyud ko makasabot ining among kahimtang. Di napod ko happy ug bisag akong ka live-in ambot happy ba kaha na siya nga di man magpirmi sa amo, mag zumba permi ug mag ballroom dancing. Palihug tambagi ko unsay akong buhaton.

BLIPPI

Dear Blippi,

Kon gustuhon gyud nimo og biya, way makapugos. Ka bata pa nimo. Mura lang kag iyang anak. So clearly mas dunay buot ang imong ka live-in, mas matured ug mas makasabot og unsa gyud nang sitwasyon ninyong duha.

Niabot na siya anang pangedaron nga 54 unya maghikog na hinuon siyag imong biyaan. Murag nag- iyahay ra mog ginamitay sa usag-usa. Ikaw sa imong madawat nga benefits gikan niya, which is money obviously kay matod pa nimo boyboyan man kaha ka niya. Ug siya sab duna pod siyay makuha nimo nga ikaw ra mismo nasayud.

Maorag dili gyud love ang reason sa inyong pag live-in. So, nganong silutan pa man nimo ang imong kaugalingon? Pangitag trabaho, barog sa imong kaugaligong tiil isip usa ka lalake.

PAPA JOE