Ang makalilisang nga gaba
Huwes si Avilla sa korte; siya ang ‘presiding judge’ sa Municipal Trial Court kun MTC sa usa ka lungsod. Gamhanan siya. Way magbuot kon maglangay-langay siya paghusay sa mga kaso sa iyang korte. Mahimuot siya, ilabi na niadtong mga kaso nga iyang gihuptan nga ang mga reklamante kun ang misang-at og mga kaso nga iyang langay-langayon. Ang mga reklamante sa kaso mubo rag kinaadman ug dili makasabot sa iyang mga maniubra sa paglangay sa kaso. Kakunsabo niya ang buhatan sa ‘city prosecutor’ sa Department of Justice.
Sapian gani ang ‘respondent’ kun akusado sa kaso nga hilom nga motunol og bagang bandol sa sapi, magkasabot dayon sila si City prosecutor de Leon nga surambawon nila ang kaso pinaagi sa paglangay sa kaso ug himuon dayon nila ang pagpalusot sa ‘mediation order’ kun pag-areglo sa kaso nga ang reklamante sa kaso mosibog sa gisang-at niyang kaso batok sa akusado.
“Hataas pa ang panahon kon ipaagi nato sa ‘trial’ ang kaso,” motambag kunuhay si City prosecutor de Leon ngadto sa nagmagahing reklamante sa kaso. “Pasayloa na lang kay bayran ka man sa tanang mga danyos nga nahimo sa akusado. Kay kon dili, namatikdan mo ang huwes nga nagsige lang sa pag-uktaba sa mga petsa sa kaso. Moabot kitag usa o duha ka tuig sa pagtunga kun pagtambong sa kaso sa korte. Hunahunaa kana, alang sa kalinaw sa hunahuna nimo.”
Matinuod ang lansis sa ‘city prosecutor’ kay si Huwes Avil- la momaniubra sab sa kaso ngadto sa abogado sa akusado nga mopalta kunuhay ug mopasumangil maskin unsa sa paglangay-langay sa gikatakdang petsa sa pagbista sa kaso. Barato ra ang multa sa abogadong mopal;ta – usa ra ka gatos ka pesos.
Ang grabeng kabuang ug tinunto nga buhaton ni Huwes Avilla mao ang pagbutang og sayop nga ngalan sa akusado. Pananglitan, kon Salvador Sanchez ang ngalan sa akusado, magtumo-tumo siya niini sa laing ngalan nga Salutario Sanchez. Unya dramahon sa akusado sa pagkuhag birth certificate gikan sa National Statistic Office (NSO) nga ang tinuod niyang ngalan mao si Salvador Sanchez. Mauktaba ang mga petsa sa pagbista sa kaso niining paagiha. Samtang si City prosecutor de Leon momanihog estorya nga aregluhon na lang ang kaso sa kantidad nga makauyon ang reklamante sa kaso.
Kon sa tan-aw sa City prosecutor nga bugo ang reklamante ug mubo rag kinaadman makombinsir ug madani kini niya sa pag-areglo sa kaso. Ingon niini sila kaigmat si Hu- wes Avilla ug si Proceutor de Leon. Kon magmagahi man ang reklamante sa kaso, ingnon kini nila nga: “Kon di ka mouyon sa pagdala ko sa kaso, pangita na lang og pribadong abogado. Busy kaayo kaming mga abogado sa gobyerno. Gusto namo nga madali ang kaso tungod sa kadaghan sa gihuptan namong mga kaso.” Molusot sila kanunay sa ilang mga kabuang ug tinunto. Grabe na karon ang ilang kasapian. Ang sapiang mga akusado mobubo kanilag binaldeng sapi.
Sa kadaghan sa ilang mga sapi, maghapihapi sila kanunay sa mga dapit sa kahilayan. Natagbaw sila sa mga ilimnong makahubog ug sa batan-ong mga babaye. Natago kini kay dagko ang ilang mga amot sa mga simbahang Katoliko ug sa ilang mga hinabang sa mga balay sa mga timawa ug makililimos.
APAN may reklamante sa kaso nga way grado ug mubo rag pailob, Si Kulas nga ang mga kaliwat ug kadugo niini kasagaran mga buang. Gilugos ug gipatay ang anak niining babaye nga may diperensiya sa pangisip. Dili makadawat si Kulas nga aregluhon ang kaso ug ‘nayabag’ sa pagpaabot sa husay sa kaso nga milanat og duha ka tuig.
Usa ka buntag mitunga si Kulas sa buhatan sa ‘city prosecutor.’ May dala siyang pinuti ug atsa. Naputol ang ulo sa sikyo nga mibabag kaniya. Unya si Prosecutor de Leon, naputol-putol ang tibuok niyang lawas ug ulo, Sa laing bahin, si Huwes Avilla giatake sa kasingkasing ug namatay tungod sa hilabihang kalisang sa nahitabo sa ‘city prosecutor’ nga iyang nahibaloan gikan sa katawhan. (KATAPUSAN)