SPURS GIBAWSAN SA OKC THUNDER

SuperBalita Cebu - - SPORTS -

Gipuga ni Dennis Schroder ang tanan niyang 19 puntos sa second half aron ituboy ang Oklahoma City Thunder ngadto sa 122-112 nga kadaugan batok sa San Antonio Spurs, sa NBA kagahapon.

Si Russel Westbrook mitali og 24 puntos, 10 ka rebounds ug walo ka assists alang sa Thunder kinsa nakabawos sa ilang 154-147 nga kapildihan sa duha ka overtime nga duwa batok sa Spurs niadtong Huwebes.

Bati nga nakasugod ang reserve pointguard nga si Schroder sa duwa diin wa kini nahimo sa upat ka field goal.

Gawas kang Schroder, maayo usab og gipakita ang ubang reserves diin sa kinatibuk-an nakakumboya sila og 48 puntos aron putlo ang tulo nila ka sunodsunod nga kapildihan.

Ang Spurs gipangulohan ni DeMar DeRozan nga may 18 punots samtang si LaMarcus Aldridge kinsa nakahulma og 56 puntos niadtong Huwebes, ning higayona igo lang nakapugnit og 17 puntos.

Permi untang naglabaw ang Spurs sa first half, apan nagsugod og kahait ang opensa sa Thunder sa ikatulong kanto ug didto nasakmit nila pagsugod ang labaw, 64-63, sa dihang mipabuto og tres si Paul George.

Ang layup ni Schroder nga natukma sa pagpapus sa oras sa third quarter maoy nagbingat sa ilang bintaha, 86-80, ug dinhi wala na usab nila buhii ang momentum sa panag-engkuwentro.

Sa laing duwa, mipabaha si Karl-Anthonyi Towns og 27 puntos ug 27 ka rebounds sa dihang gipakagaing sa Minnesota Timberwolves si Anthony Davis ug ang New Orleans Pelicans, 110-106.

Kini maoy unang pag-asumir ni Ryan Saunders isip interim headcoach diha sa ilang korte human palagputa sa T-Wolves si Tim Thibudeau sa niaging semana.

Ang tres ni Towns maoy naghatag sa 106-103, 2:55 ang nahabilin sa duwa. Iya usab nga natapalan si Anthony Davis sa krusyal nga bahin sa panag-engkuwentro nga posibling mao unta ang makapausab sa dagan sa duwa.

Si Davis mipaksit og 30 puntos nga may 14 ka rebounds alang sa iyang ika-13 nga sunodsnod nga double-double.

Lab-as gikan sa ilang pagkapukan sa Dallas sa niaging gabii, krusyal ang maong kadaugan sa Wolves sanglit mao kini magpaduol kanila og balik sa playoffs.

Ang Mavericks, Pelicans ug Wolves nagsawo sa ika-11 nga puwesto sa Western Conference.

Newspapers in Tagalog

Newspapers from Philippines

© PressReader. All rights reserved.