Philippine Azkals may paglaom pa

Taliwala sa ilang duha ka sagunson nga kapildihan, nagpabilin pa gihapon ang paglaom sa Philippine Azkals nga makasulod sa knockout stage sa nagpadayon nga AFC Asian Cup nga gipahigayon didto sa Zayed Stadium sa Abu Dhabi.

Ang Pinoy booters, sa opening day, gipatapsingan sa South Korea, 0-1, ug giusban sa pagkapukan sa China sa niaging adlaw, 0-3, nga naghatag kanila og kalisdanan nga makatikang sa sunod round.

Hinuon wala pa hingpit mapapas ang ilang paglaom ug aron kini makab-ot kinahanglan impresibo nila pildihon ang Kyrgyz karong Miyerkules.

Kini tungod kay ubos sa format, kon kinsa kadtong pinakanindot og record sa tanang third placers sa matag grupo, mao usab ang mahatagan og luna alang sa knockout stage.

Sama sa Pilipinas, ang Kyrgyz napildi usab sa Koreans, 0-1.