ALANG KANIMO, PA: SORONGON

Sa way igong mga pagduda, gipadayon ni Ruffa Sorongan sa iyang kalantip ug kahanas sa natado sa lumba sa dagan sulod sa unom niya ka tuig nga nagbasehan dinhi sa Sugbo.

Kagahapon, iya na usab nga gidugangan ang tapok sa iyang mga titulo pinaagi sa pagdominar sa 2019 Cebu Marathon nga misugod ug mitapos sa Cebu Business Park. Lumad nga taga Sultan, Kudarat, gipahinungod ni Sorongon ang iyang kadaugan ngadto sa iyang 67-anyos nga amahan nga si Patricio kinsa maoy tinubdan sa inspiration ning iyang

karera.

“Ako ning ipahingungod ngadto sa akong papa kinsa bag-o pa lang nakagawas sa tambalanan. Hardwork kaayo siya sama sa ubang mga mag-uuma didto sa amoa. Na-ospital siya tungod sa sakit sa iyang kidney,” matod ni Sorongon.

Ang 27-anyos nga ani-a na magbasehan sa Sugbo mitapos sa 42 ka kilometro nga rota sa oras nga 3:29:30 aron dominahon ang women’s category.

Kini maoy iyang unang higayona nga midaog sa 42 K run bisan pa man og siya nakalangkat na og mga titulo sa 21-k run.

Alang kaniya nga ang iyang kadaugan ug ang pagkaayo sa iyang amahan maoy tubag sa iyang pag-ampo ngadto sa Sto. Nino, usa ka semana sa dili pa saulogon ang kapistahan niini.

Si Sorongon pirming nagsunod ni Evamie Villarin sa unang 16 ka kilometros apan misugod kini pag-arangkada sa ika-17 nga kilometro ug ning higayona wala na kini molingi pa hangtod sa finish line.

Si Villarin maoy misakmit sa second place sa oras nga 3:30:13 ug ikatulo si Sandra Soliano (3:52:25).

Sa 42-k class men’s, ang Kenyan nga si Joseph Mururi, sa unang higayon, maoy mipatugbabaw sa maong division sa oras nga 2:39:44. Kini maoy iyang ikaduhang pagsuway sa Cebu Marathon hukman kini mapakyas sa una.

“Sto. Niño is a blessing to us and that is why we are celebrating this kind of event,” matod sa 33-anyos nga Mururi, kinsa pirming mobiyahe sa bisan asang dapit sa nasod aron mosalmot og mga marathon.

Nagusnod kaniya si Bryan Quiamco (2:40:06) ug ikatulo si Noel Tillor (2:40:07).

Ang kampiyon sa matag division sa 42-k makadawat og P20,000, samtang P15,000, P10,000, P7,000 ug P6,000 alang sa second ngadto sa fifth placers.

Sa 21 K, ang taga Ginatilan nga si Joseph Arnel Emia maoy nanghari sa men’s samtang si Melody Perenz ang nanghawod usab sa women’s division.

/ ARNI ACLAO ■ 2019 QUEEN OF THE ROAD: Si Ruffa Sorongon nga inusarang padulong nang molabang sa finish line niining aktoha aron patigbabawan ang 2019 Cebu Marathon women’s division nga nanukad ug mitapos kagahapon sa Cebu Business Park.