Barko sa Roble sakyan sa Santo Niño sa seaborne procession
Nakasinggit og Viva Pit Senyor si Beatriz Roble, dihang ilang nahibaw-an nga usa sa ilang mga barko sa Roble Shipping Inc. ang sakyan sa mga imahen sa Señor Sto. Niño ug Birhen sa Guadalupe atol sa fluvial procession karong Sabado, Enero 19.
Ang 71 anyos nga ginang na-diagnose nga dunay stage 1 breast cancer niadtong Disyembre 5, 2017, hilabihan ang gibati nga kalipay nga ang barko sa ilang kompaniya ang napilian nga maoy gamiton nga galleon ug sila ang moandam sa dekorasyon.
Bisan niining pagsuway, matod ni Jose Emery “Joy” Roble, presidente ug chief executive officer sa RSI ug kinamaguwang anak ni Beatriz sa pito ka magsuon, nga wa sila mobuhi sa ilang debosyon sa Señor Sto. Niño.
Gani, niadtong 1994 hangtod sa 1997, grabe usab ang ilang pagsuway diin ang ilang kompanya makonsiderar nga bankrupt na.
“Ang inyong pag-antos, ang pag-antos ninyo nga kinasingkasing, hugot nga pagtuo sa atong mahal nga patron Señor Sto. Niño nga inyo ra gyud seilang guro mga pangaliyupo, ma-realize ra gyud na, madungog ra gyud na ang inyong mga pag-ampo,” dugang ni Jose Emery atol sa press conference niadtong Lunes, Enero 14.
Nagsugod ang ilang debosyon sa balaang bata gikan pa sa ilang mga apohan ug sunod nahimong Hermano ug Hermana mayor ang iyang mga ginikanan, dayon ang iyang uyoan ug iyaan ug sunod ang iyang manghod nga si Jay ug asawa niini nga si Elvina.
Sigon ni Jose Emery sud na sa kapin 30 ka tuig nga sila nag-ampo nga mahimong galleon atol sa fluvial procession sa Señor Sto. Niño ang usa sa ilang mga barko.
Iyang gihulagway nga katumanan sa ilang damgo ang pagkapili karong tuiga ug dili matukib ang kalipay nga ilang gibati.
“Kami, wala ni namo damha gyud dugay na namong katuigan kay sige lang mi og sunod-sunod kon asa na ang iyang galleon sa una, karon nahitabo kita nay sundan,” sigon sa presidente sa RSI.
Ang mv SuperJoy, ang duha ka tuig nga fast craft nga gikan sa Japan ug bag-ong gi-refurbish ug gikan og gi-drydock, ang labing unang pasaheroan nga barko nga luwanan sa duha ka mga imahen atol sa procession sa kadagatan gikan sa dakbayan sa Lapu-Lapu pabalik sa siyudad sa Sugbo.
Aduna kini gibug-aton nga dul-an sa 200 gross tonnage ug moabot sa 240 ka mga tawo ang kapasidad niini.
Sumala ni Elvina, ang gitahasan sa dekorasyon sa galleon, mga buwak nga dugay malaya sama sa anthurium, wonder wise, sunflower ug orchids ang ilang gamiton nga dayandayan nga ipalibot sa barko gamit ang mga color nga yellow, puwa ug berde.