Lapu-Lapu mopatuman og rerouting tungod sa prosisyon sa Sto. Niño

SuperBalita Cebu - - BALITA -

Gipahibawo sa City Traffic Management System (CTMS) sa dakbayan sa Lapu-Lapu nga sirad-an ang pipila ka kadalanan sa dakbayan paingon sa Merkado Publiko ug simbahan sa National Shrine sa Virgen dela Regla karong Enero 19 sa kaadlawon, Sabado.

Kini gumikan sa ipahigayong Traslacion sa habig sa dakbayan sa Lapu-Lapu diin gikatakdang dawaton sa dakbayan ang imahen sa balaang bata gikan sa dakbayan sa Mandaue.

Magsugod ang pagsirado sa mga dalan sugod sa ala 1:30 sa kaadlawon.

Sirad-an mao ang dalan G.Y Dela Cerna ug pipila ka bahin sa M.L. Quezon National Highway gikan sa eskina sa may tiilan sa Mandaue-Mactan Bridge hangtod na sa eskina sa P. Rodriguez St paingon sa Looc Elementary School.

Ang dan sa S. Osmeña gikan sa eskina Ceres St hangtod sa eskina Lopez Jaena St (atubangang bahin sa ganghaan sa simbahan) sirad-an usab.

Laing sirad-an mao ang tibuok dan sa Lopez Jaena gikan sa Mantawi Road paingon sa eskina P Rodriguez, eskina Dan Cleland St, pipila ka bahin sa P. Rodriguez St gikan sa G.Y Dela Serna St hangtod sa eskina B.M Dimataga sa Brgy Poblacion, tibuok B.M Dimataga St ug Risdon St.

ALTERNATIBONG ROTA

Ang mga motorista nga mopaingon sa dakbayan sa Sugbo, Mandaue ug MEPZ (Mactan Export Processing Zone) gikan sa Brgy Looc, Babag ug Cordova mahimong moagi sa dan A. Tumulak via Merjin, S. Osmeña ug Hoops Dome road dayon liko pawala sa Maximo V. Patalinghug Avenue dayon liko patuo sa M.L Quezon National Highway sa Brgy Pajo ug lahos sa Marcelo Fernan Bridge.

Ang mga sakyanan gikan sa Brgy Marigondon ug Brgy Basak nga mopaingon sa dakbayan sa Sugbo, Mandaue ug MEPZ mahimong moagi sa MVP Avenue, liko patuo sa M.L Quezon National Highway sa Brgy Pajo ug diritso na sa Marcelo Fernan Bridge.

Alang niadtong mga sakyanan nga gikan sa dakbayan sa Sugbo, Mandaue ug MEPZ nga gikan sa Marcelo Fernan Bridge ug paingon sa lungsod sa Cordova o Marigondon mahimong makaliko pawala sa junction sa City Hall paingon sa Seawage-Matumbo Road o moliko pawala sa MVP Ave sa junction sa Sangi ug lahos na sa ilang destinasyon.

Temporaryong Loading ug Unloading area sa PUJ

Tanang PUJ ug FILCAB paingon sa merkado publiko mahimong makapakanaog sa ilang mga pasahero sa Terminal 1 sa Brgy Pajo (atubangan sa GMC) sac karaang terminal.

Ang mga PUJ ug FILCAB gikan sa Cordova paingon sa merkado publiko mahimong makapakanaog sa ilang mga pasahero sa regular nga loading ug unloading area sa Looc Elementary School.

Himuon unyang temporaryong loading ug unloading area sa mga tricycle paingon sa kabarangayan mao ang GUSA basketball court sa Humay-Humay sa dakbayan sa Lapu-Lapu.

Samtang ang mga tricycle nga paingon sa Brgy Babag,Kalawisan,Timpulok,Canjulao ug Carahay mahimong makapasakay ug kanaog sa ilang mga pasahero sa ilang abotanan sa may dan P. Rodriguez, eskina Dan Cleland ug Lopez Jaena.

Newspapers in Tagalog

Newspapers from Philippines

© PressReader. All rights reserved.