MGA POLICE ESCORT GIBAWI NA

Gawas sa pagpatuman sa

election gun ban sa pagsugod na sa election period niadtong Dominggo, gipa-recall na usab ang tanang police detail sa lokal nga mga opisyal, gikan sa mga konsehal hangtod na sa mga senador. Sigun sa Commission on Elections

(Comelec) sa lalawigan sa Sugbo, mahimong mo-request ang mga opisyal nga ibalik ang ilang mga police escort.

Sa di pa, ipaubos sila sa threat assessment.

Niining pagsugod na sa election period, lakip si Gobernador Hilario Davide III sa mga opisyal lukop nasud nga wa nay security

detail gikan sa kapulisan. Apan giklaro niya nga dili lang kini kagahapon nagsugod, kundi sa miaging tuig pa.

Sa Hulyo sa miaging tuig, gipa-recall ni Police Regional Office (PRO7) Director Chief Supt. Debold Sinas ang tanang police detail sa mga piniling opisyal, lakip na niadtong mga pulis nga gipa-detail sa mga lokal nga kagamhanan.

Karong tuiga, gipatuman ang routine recall aron pagpugong sa posibleng election violence ug pamolitika sa pwersa sa kapulisan.

WA MAPROBLEMA

Matod ni Davide, di problema kon wa siyay escort kay duna may mga kawani sa Kapitolyo nga iyang kuyog sa mga lakaw.

Gawas pa, nagtuo siya nga angay gamiton sa police operations ang mga pulis.

“Kana gyud sila (police) should be in the filed gyud ba, ilabi na karon, para sa peace and order situation. Mas magamit sila kon anaa sila sa ilang mga station. Katong duha nako ka mga detail, nabalik na man sa ilang station and two have retired already,” niingon si Davide.

NAGKUWANG

Samtang si acting Cebu election supervisor Atty. Jerome Brillantes niingon nga kuwang ang pwersa sa kapulisan alang sa eleksiyon busa gimando ang pagpa-recall kanila.

Alang sa mga opisyal nga gustong mabalik ang ilang police detail, mahimo ra silang mo-request sa buhatan sa Comelec.

Ang Comelec na maoy mo-endorso niini ngadto sa Rejional Joint Security Control Center (RJSCC).

Giklaro hinuon ni Brillantes

nga kinahanglang ipaubos sa threat assessment ang hingtungdang opisyal.

Sutaon kon kinahanglan bang

hatagan siya og police detail. “Kon naay makita namo nga may threat gyud ang usa ka politiko o usa ka candidate, amo na siya i-kuan (endorse) sa RJSCC for issuance of temporary detail for 30 days, while gipasa sa sa RJSCC or regional security command ngadto central for permanent issuance of security detail,” pasabot ni Brillantes.

Mahimo sab nga mokuha sa serbisyo sa pribadong security

agents ang mga kandidato o mga opisyal nga wala na’y police detail. Giklaro hinuon sa Comelec nga kinahanglang accredited kini sa Philippine National Police (PNP) ug mokuha sab sila og awtoridad gikan sa komisyon alang niini.