P1M gidonar ngadto sa PRO7 alang sa mga kaso
Usa ka milyon ka pesos ang gidonar sa usa ka negosyante sa syudad sa Sugbo alang sa mga personnel sa Police Regional Office 7 nga nag-atubang og kaso nunot sa ilang trabaho.
Mapasalamaton ang PRO 7 sa gihatag alang kanila.
Gitunol sa inilang magpapatigayon sa syudad sa Sugbo, Douglas LuYm, ang tseke nga P1 million.
Magsilbe kini nga legal assistance sa mga pulis nga gipasakaan og kaso nunot sa ilang trabaho.
Matod ni LuYm nga dili lang kini ang unang higayon nga mitabang sila sa kapulisan.
Nitunol usab silag dakong kantidad alang sa 44 ka mga sakop sa Special Action Force nga napatay sa engkwentro sa Mamasapano sa Maguindanao ug kadtong dakong trahedya sa syudad sa Naga.
Ang maong kantidad giingong gikan sa iyang gilusad nga fund raising sa golf tournament diin ang ilang natigum ilang nahukman nga ihatag sa kapulisan.
“You know, I always believed that a strong military, make a strong nation and a strong police makes a city very safe to live with. As long as the policemen will do their job, I’m alway behind and support them,” matod ni LuYm.
Andam usab sila nga mohatag og maayong abogado sa mga pulis nga gi harass ug gipasakaan sa kaso tungod lang kay naghimo kini sa iyang trabaho.
Kapin na sa P 7 million ang ilang nadonar ngadto sa PNP sa nanglabay nga mga tuig.
Lakip na niini ang nahitabong trahedya sa syudad sa Naga.
Tungod sa maong donasyon gipasalamatan ni Chief Superintendent Debold Sinas si LuYm nga nagpakabana sa kapulisan sa Central Visayas nga nag-atubang og kaso tungod lang sa ilang trabaho.
Gipasabot niya nga ilang gidawat ang maong dakong kantidad sa pasalig nga way bugti nga ilang hatagan og VIP treatment ang negosyante.
“Gidawat namo ni gikan sa iyaha. Amo siyang giestoryahan nga kon magtabang walay mga demand. Kon tabang siya, tabang gyud and i’m happy kay ingon siya nga ah wala. Hatag lang nako na sa inyoha as part sa fund raising sa golf niya,” matod ni Sinas.
Usa sa mga problema nga gisagubang sa kapulisan sa rehiyon 7 ang mga kaso nga gipasaka batok sa mga pulis tungod sa ilang trabaho nga gihimo.
Tungod sa maong pundo, aduna na unyay ikasukol ang mga pulis.
Iyang giklaro nga kadto lamang mga pulis nga lihitimo nga milusad sa operation ang ilang abagan.
Mahimong modawat pa silag hinabang gikan sa mga negosyante apan iyang gipasabot nga ila una kini ipaubos sa back ground investigation aron masuta kon asa kini gikan ilabi na karon nga duol na ang eleksyon.
Modawat usab sila kon ang maong personalidad wa malambigit sa illegal nga kalihukan.