CPDRC wa nay drugs?
Dili pa ta ka con irm niini, pero usa ka tinubdan ang mibutyag nga wala na o kaha niminus na ang pagkatap sa gidiling drugas karon sa Cebu Provincial Detention and Rehabilitation Center (CPDRC) sukad nga si retired chief inspector Reynaldo Valmoria na ang nahimong jail warden.
Ang 57 anyos nga Valmoria kinsa 32 na ka tuig nga nagserbisyo sa Philippine National Police (PNP), maoy mipuli ni Roberto Legaspi, ang officer-in-charge sa maong bilanggoan niadtong Mayo 2018.
Sa wala pa matudlo si Valmoria sa maong position, gihamok ug sunodsunod nga kontrobersiya ang CPDRC tungod sa grabing pagkatap sa gidiling drugas.
Pila ka higayon nag-ilis-ilis og jail warden ang CPDRC, apan sa gihapon wa masulbad ang paghitak sa illegal drugs sa sulod niini, tungod sa rason nga sila ray nasayod.
Apan karon nga ubos na sa liderato ni Valmoria, matod pa, lahi na ang pagpadagan sa maong prisuhan kay iyang istriktong gipatuman ang mga polisiya ilabi na niining mga jail guards.
Kon kaniadto yano rang makapasulod ang mga guwardiya ug bisan unsang mga kontrabando, karon gimonitor na sila og maayo kay bisan unsaon nato og kuwenta sila man gud ang dunay responsibilidad pagpasulod og mga kontrabando.
Permi na usab ipahigayon ang kinalit nga Greyhound operations sa matag selda sa prisohan hinungdan nga dili na makabuylo ang mga drug personalities.
So kon nahimo ni karon ubos sa pamunoan ni Valmoria, nganong wa man ni himoa sa nangaging mga jail warden sa CPDRC kaniadto.
Wa ta kadungog og lama sa pangatungdanan ni Valmoria sa PNP, ug hinaot nga motunhay kining iyang tinud-anay nga pagserbisyo diha sa CPDRC. Keep up the good work, Sir.