Someone’s waiting for you

(Ikalima sa pito ka mga gula)

Mitapad si Ador nako sa paglingkod. Bugnaw ang hangin kay duna may low pressure. Apan dagom ra sa kawanangan ang makita, way uwan.

“So, magsugod na ta, Dor.” Mipahiyom ko. Naklaro ko sa nawong ni Ador nga diha gihapon ang iyang kauwaw. Aw, angay ko lang siyang sabton. Naninguha ko nga mahimong komportable ang iyang pagbati nako.

“Ikaw gyud, Dor, bisag amigo na ta, mauwaw gihapon ka nako. Isipa ko nga imong friend, not agawon. Okey?” Hinay kong gihapak ang bukton ni Ador.

Nangawot si Ador sa iyang ulo ug igo lang mipasiplat nako. Bisag pagtan-aw og dugay nako di siya makahimo.

“Kuan man gud, Mam, di gyud kalikayan nga mauwaw ko nimo.”

“Na, duna sab koy ihangyo nimo, Dor. Ayaw na kog tawgag Mam kon kita rang duha. Tawga ko sa akong ngalan. Daleen na lang gud ang itawag mo nako.”

Nagpakuting-kuting si Ador sa gitara. Unya mitando siya. Ug mi-smile. Nalipay ko sa iyang reaksiyon.

“Kana, ingon gyud ana, Dor ang ipakita mo nako, nga madasigon ka uban nako, nga di ka mauwaw nako.”

Gitudloan ko ni Ador sa pagsista. Daghan siyag gitudlo nako. Ug di gyud kalikayan nga magkabag-id ang among mga lawas. Apan wa ko kini hatagig bili. Maoy diha sa akong hunahuna nga makaton kog duyog sa sista pinaagi kang Ador. Midip-ig pa gyud ko kang Ador. Iyang gikuptan ang akong kamot nga nagtapion sa mga kuwerdas. Iyang gitudlo nako kon unsa ang hustong pagtapion sa mga tudlo sa mga kuwerdas, ug kon unsaon pagkaskas sa mga kuwerdas agad sa tuno nga akong gusto.

“Gusto kong kantahon ang ‘My Way’, Dor.”

Gitudloan ko ni Ador sa key sa pagduyog sa sista sa maong kanta. Gisunod ko ang gisulti ni Ador, ang pagtapion sa akong mga tudlo sa mga kuwerdas, ug ang pagpahimutang sa pagkaskas sa mga kuwerdas.

Gihinay ko lang ang pagkanta kay di ko gustong makadungog sila si Mama ug Papa nga niadtong tungora nanulod na sa ilang kuwarto, ug ang akong manghod natulog na sab sa iyang kuwarto.

Nakapahiyom kog maayo pagkahuman kog kanta sa ‘My Way’. Sa akong pagtuo, dali ra kong makat-on sa musika pinaagi kang Ador. (SUMPAYAN)