TIMBANG DI PROBLEMA NI TEPORA: TRAINER
Gipaneguro sa kampo ni World Boxing Association (WBA) Interim featherweight champion Jhack “El Capitan” Tepora nga dili magproblema sa timbang ang ilang batos sa umaabot niining dakong tahas.
Si Tepora (22-0, 17KOs) nakatakdang modepensa sa iyang korona batok Mexican Hugo Ruiz (38-4, 33KOs) sa undercard sa Manny Pacquiao-Adrien Broner bout karong Enero 20 (RP time) sa MGM Grand Garden sa Las Vegas, USA.
Giangkon ni Jingjing Tepora, igsuon ug headoach ni Jhack, nga milapas og 17 pounds sa 126-pound weight limit ang iyang manghod pagabot niini sa Amerika sa milabayng pipila ka mga adlaw.
“Nag-monitor man ko permi unya karon lang, 11 pounds na lang ang over ni Jhack. Wala na’y problema, kaya na kaayo na kuhaon inig abot sa away,” matod ni Jingjing sa pagpakighinabi ning mantalaan kagahapon.
Si Jingjing wala makadungan og larga sa Team Tepora paingon sa Amerika gumikan kay aduna pa kini gihikay kabahin sa iyang US visa.
Kauban ni Jhack nga minglarga sa Amerika mao ang lain niyang igsuon ug trainer nga si Pingping ug ang asawa niining si Dinah.
Gipasabot ni Jingjing nga gihatagan sab og nutritionist si Jhack sa nagdumala niini nga mao ang MP Promotions hinungdan nga wala siya nabalaka bisan gamay.
“Dili na isyu ang timbang pero labing seguro, nindot gyud ning awaya kay pareho silang knockout puncher,” matod ni Jingjing. “Tan-aw nako, naa gyu’y matumba aning awaya hilabi na kon dili modagandagan ang kontra. Dili lang gyud mokompiyansa kay kusog sab ni’g kumo ang kontra.”