3x3 sa SMS, katumanan sa mga bata natuman
Alang sa batan-ong mga basketbolista sa Sisters of Mary School (SMS) Boystown ug Girlstown, ang pagpahigayon sa makasaysayong Chooks-to-Go SBP 3x3 Basketball Tournament katumanan sa ilang pangandoy.
Ang kapin sa 3,000 ka mga estudyante sa SMS nga ningsalmot sa kompetisyon nalantawan nang daan nga mobuak sa kasamtangang rekord sa FIBA 3x3 nga 1,898 ka mga partisipante sa Under-18 tournament.
Naghuwat na lang ang mga nag-organisar sa opisyal nga desisyon gikan sa FIBA, nga maoy nagdumala sa basketball sa tibuok kalibutan.
Nagkanayon si SMS athletic director Van Halen Parmis nga ang exposure maoy labing bililhon nga nakuha sa ilang mga estudyante.
Ang torneyo gipahigayon sa SMS Boystown sa Minglanilla niadtong Sabado dayon motapon kini sa SMS Girlstown sa Talisay niadtong Dominggo.
“It’s dream come true, it was like a gift of father Al (Aloysius Schwartz), the founder of Sisters of Mary,” matod ni Parmis sa interbyu sa Sun.Star Cebu, igsuong buhatan ning mantalaan.
Ang Team B8-Leg 4, nga gilangkuban nila ni Joefrrey Ramiso, Argie Basaya, Dennis Gantaloa ug Alunar Escraman, maoy miangkon sa boys overall title.
Samtang ang Team Leg 6G1, nga gilangkuban Aiana Spostol, Desiree Salvado ug sa kaluhang silang Gleafel ug Gleagen Janier, mao ang ningkampiyon.
Adunay 1,588 ka mga magduduwa ang ningsalmot sa girls division samtang 1,111 sa boys division.