Sinulog Open billiard sugdan karon

Pangulohan sa Sugbuanong si Warren Kiamco ang mga bilyarista nga monumbol sa Jancor Promotions 2019 Sinulog Open Billiard Tournament nga sugdan karong adlawa sa Jancor Billiard Hall sa dalan Manalili, likod sa Manalili.

Nagkanayon ang promoter nga si Allan “Toryaw” Cortes, daghang dekalidad nga mga bilyarista nga gikan sa Manila ug ubang mga dapit sa Mindanao ang manulong sa torneyo nga adunay kinatibuk-ang ganti nga P300,000.

“Si Warren naa na diri sa Cebu pero daghan pang mangapil nga gikan sa Manila ug Mindanao,” matod ni Cortes.

Ang torneyo modagan og lima ka mga adlaw. Sa magunang upat ka mga adlaw ipahigayon ang elimination rounds unya ipahigayon ang championship karong Enero 19.

Ang kampiyon sa torneyo makabulsa og P120,000, makaluklok og 60,000 ang 2nd placer, P25,000 sa 3rd placer ug P15,000 sa 4th placer.

Ang 5th ngadto sa 8th placers makapanag-iya og P5,000 matag usa, ang 9th ngadto sa 16th placers adunay P3,000 matag usa samtang ang 17th ngadto sa 32nd placers makakuha og P2,000 matag usa.

Sa dugang mga impormasyon, mahimong motawag sa 09222441929, 0955-9958006 o 09306408267.