Alab nasugamak og laing kapildihan
Nasugamak sa kulbahinam nga kapildihan ang San Miguel Alab Pilipinas batok sa host Formosa Dreamers, 73-72, niadtong Dominggo sa gabii sa Asean Basketball League (ABL) sa Changhua County Stadium sa Changhua City, Taiwan.
Nag-ung-ong na unta sa kadaugan ang Alab Pilipinas dihang nakapasulod og three-point shot si Ethan Alvano nga naghatag kanila og 72-70 nga labaw sa nahabiling unom ka mga segundos.
Apan sa return play, mibawos og three-point bomb si Lee Hsueh Lin sa nahabiling usa ka segundo aron agakon sa kadaugan ang Dreamers.
Ang Dreamers ningsaka sa 8-4 nga rekord samtang ang Alab nahagsa sa 6-2 nga baraha.