DENGUE SA LAPU-LAPU MI-TRIPLE
Mi-triple ang gidaghanon sa mga kaso sa dengue sa Dakbayan sa Lapu-Lapu sa Enero 2019 itandi sa Enero 2018.Ang kahugaw ug pagpasagad sa pipila ka mga residente sa ilang palibot maoy gibasol ni City Health Officer Dr. Ages Cecil Realiza sa pagkuyanap sa mao nga sakit nga dala sa lamok.
Gikan sa 56 ka mga kaso nga nataptan sa dengue virus niadtong Enero 2018 itandi sa miaging Enero ning tuiga, moabot sa 171 ang ilang natala.
Dugang 128 ka mga kaso ang napuno sa talaan gikan sa unang adlaw sa Pebrero ning tuiga ngadto na Pebrero 9, base sa record sa Regional Epidemiology Surveillance Unit (RESU) sa Department of Health 7.
Mga barangay nga adunay taas nga kaso naglangkob sa Barangay Basak, Babag, Mactan, Marigondon, Pusok ug Gun-ob.
Samtang nasulod sa top 10 barangay nga daghan og kaso ang Barangay Kalawisan, diin adunay usa ang namatay niadtong Enero 29.
Ang nahisgutang barangay gihulagway nga adunay taas ang populasyon.
Si Claire Amoro, 18, call center agent, taga-Sityo Imbao namatay niadtong Enero 29.
Iyang mga manghod ang ningpositibo usab sa maong sakit.
“Sa pag-investigate namo (matag barangay) og nganong taas ang dengue, makuan sad namo… ang surroundings hugaw,” pasabot ni Realiza.
Sa susamang kalambuan, gitataw ni Mae Tepait, coordinator sa Expanded Program on Immunization sa City Health Office, nga ang pagsulbong sa mga kaso sa dengue way kalabutan sa Dengvaxia.
Nipasabot si Tepait nga niadtong hinapos sa 2017, giundang na ang pagpabakuna sa Dengvaxia sa dihang nitumaw ang kontrobersiya.
“Una natong pagpang-inject (Dengvaxia) January 2017. Unya kay naa may isyu, mao tong second vaccination nga para sa December 2017 wa na idayon,” matod ni Tepait sa dihang nahinabi sa Superbalita Cebu.
Dugang pa ni Tepait nga ang kumpiyansa sa publiko sa pagpanglimpyo maoy hinungdan nga mikuyanap ang maong virus.
Matod ni Realiza nga tibuok tuig ang ilang environmental sanitation education, apan gidoble karon ang ilang kampaniya batok dengue inabagan sa barangay health workers.
PANGPATAY
Sayo ning semanahona, nangabot na ang larvacide ug misting chemical nga ibubo ngadto sa napundo nga tubig aron sa pagpatay sa mga itlog sa lamok.
Nangabot na sab sa miaging adlaw ang 75 ka mga rolyo sa mga insecticide-impregnated mosquito nets nga ipangapod-apod sa mga tunghaan, ilabi na niadtong barangays diin taas ang dengue cases.
Sud sa tulo ka tuig magamit ang nets nga itaod sa mga bintana sa lawak saringan sa first o ground floors sa matag school building.
Nanawagan si Realiza sa matag residente nga kanunayon ang pagpanglimpyo sa ilang nataran kay kaayuhan ra usab sa kinabag-an. /