Balay sa bag-ong gikasal naugdaw
Ang kalipay nga gibati sa usa ka magtiayon human sa mass wedding sa dakbayan sa Mandaue niadtong Pebrero 14, napulihan kagul-anan dihang naugdaw ang ilang balay sa sunog nianang pagkagabii sa samang adlaw.
Samtang nagsaulog, nagsadya ang pamilya, kahigalaan ug mga silingan sa magtiayon nga Pablito Baldado Jr. ug Maurene, niulbo ang kayo sa ikaduha nga andana sa ilang panimay sa Purok 4, Barangay Cubacub sa Mandaue.
Nadawat sa kabomberuhan sa Mandaue ang alarma sa sunog, alas 8:48 sa gabii niadtong Huwebes, Pebrero 14.
Ang magtiayon ang usa sa 136 ka paresan nga naka-benipisyo sa mass wedding nga gipasiugdahan sa kagamhanan sa Mandaue isip usa sa ilang kalihukan atol sa pagsaulog sa Valentine’s Day.
Matod sa chief fire investigator sa Mandaue City Fire Station, SFO2 Edgar Vergara, nga alas 9:06 sa gabii na nakontrolar ang sunog, ug gideklarar nga fire out sa alas 9:09. Giisa kini sa 2nd alarm.
Wala ra nakatapon ang sunog sa mga silingan nga balay.
Sa inisyal nga pakisusi, giingong nga nagsugod sa usa sa mga kwarto sa ikaduha nga andana ang sunog.
Sa dihang nakit-an sa mga tagtungod ug silingan ang kayo, gisulayan pa unta kini sa pagtabang og palong.
Hinungdan nga tulo sa kabanay ang nakaangkon og 1st degree burn. Anaa ra sila sa luwas nga kahimtang.
Usa sa gisusi sa kabomberuhan nga electrical short circuit ang posible hinungdan sa sunog. Gibanabanang danyos moabot og P50,000-P60,000.
Ang City Social Welfare Services (CSWS) sa Mandaue ang dali usab nga nihatod sa inisyal nga hinabang sama sa pagkaon, alang sa tulo ka adlaw nga pagkaon, kitchen utensils ug gamit sa pagtulog.
Matod ni Jessie Perez, ang pangu sa CSWS nga giandam na usab ang pinansyal nga hinabang sa pamilya.