GMA ACTRESS NAKUHAAN OG MARIJUANA, GIDAKOP
Giaresto sa Philippine Drug Enforcement Agency (PDEA) ang character actress nga si Roence Santos ug ang laing tulo pa niya ka mga kauban.
Kini human nga na-intercept ang ilang gisakyang Toyota Fortuner nga dunay sulod nga siyam ka mga bulto sa marijuana sa Barangay Urbiztondo, San Juan, La Union, niadtong Pebrero 12 nga motimbang og 25 kilos ug gibanabanang mokantidad og P3 million.
Si Roence, 42, taga-Los Baños, Laguna, usa ka film/TV/stage actress ug katapusan siyang nakit-an sa kanhi GMA-7 primetime series nga “Kambal Karibal” isip si Black Lady. Nigawas usab siya sa indie films sama sa “Boso” ug “Kubrador.”
Apan sa interbyu sa Bombo Radyo La Union, matod ni Roence nga dili ilaha ang maong mga marijuana nga nakit-an sa ilang sakyanan ug nga “planted” ra kuno ang maong mga droga. /