You don’t belong to me
Dugay nga mitutok si Rayner nako. Klaro nga nakurat siya sa akong giingon. Wa siya makatingog. Gihapak kog hinay ang iyang bukton. Nagkatawa ko aron ipakita sa akong friend nga wa ko seryusoha ang akong namatikdan niya.
“Naunsa ka, Rayner? Nagselos ka adtong laki nga nagsigeg tan-aw nako?”
Nangawot si Rayner sa iyang ulo, ug unya mikatawa sab siya.
“Selos? No way. Wa man koy right nga magselos, di ba? We’re only friend, that’s all.”
Gikuptan ko sa kamot si Rayner dayon kong bira niya paingon sa canteen nga duol na lang namo.
“Bitaw. Friend lang ta. Tana, uy, kay gigutom na kaayo ko.”
Way tingug-tingog si Rayner samtang nag-esnak na mi. Usahay motan-aw siyag kadyot nako, nag-atbang mig lingkod.
“Morag may problema gyud ka, da, Rayner?”
Miinom ko sa akong pineapple juice. Nagtan-aw ko kang Rayner. Gusto kong maniid sa iyang reaksyon. Miduko si Rayner. Wa ko niya tubaga. Sa tan-aw ko niya, duna siyay gihunahuna pag-ayo.
“Hey!” Gihapak kog hinay ang kamot ni Rayner nga nagpatong sa ibabaw sa lamesa. “Tell me, uy, ko unsay nakahasol nimo?”
Mitan-aw si Rayner nako. Gikidhatan ko siya. Nakapanglingo siya unya mikatawa og hinay. Dali ra kay miseryuso man dayon siya. Dugay ko niyang gitan-aw.
“Na, mahilis gyud ko anang imong tinan-awan nako, Rayner.”
“Kining, Judith, motuo ka anang giingon nga, love at first sight?”
Ako na sab ang wa makatingog. Nagbuka ang akong baba apan way bisan usa ka pulong nga migawas. Misugod pagbutuk-butok og kusog ang akong dughan. Nasabtan ko ang gipangutana ni Rayner.
“Kuan man gud, Judith, nalove at first sight ko nimo.”
Na, morag mobuto ang akong dughan sa kusog na gyud nga pagbutuk-butok ani. Nahigugma si Rayner nako? Unsaon na man lang ani ron? Hilom kong nakaingon. Dunay kabalaka nga gibati ko dayon.
“Na-in-love ka nako?” Hapit di makagawas ang akong tingog. Mikurog pa gyud kini.
“Yes, Judith. Bag-o pa tuod tang nagkaila pero may nang makahibawo ka na sa akong gibati nimo.”
“Kakusog sab nimo, uy, Rayner?” Mikatawa ko ug gipakita ko kang Rayner nga wa ko seryusoha ang iyang pagpangulitawo nako.
Apan sa tan-aw nako kang Rayner, tinud-anay ang iyang giingon nako.