Mga bas sa panahon

Matag usa kanato may iyang bildong orasan Sa atong paglakaw sa dalan sa panahon.

Usa kini ka bildong kupa nga duhay lubot Diin ang mga bas sa panahon nag-agay paubos. Gikan sa ibabaw nga sudlanan ang pinong bas Moagas sa ubos nga sudlanan sa gilatid niyang Gikusgon agad sa gamhanang kamot sa Di-makita Apan may mga mata nga kanunay nagsud-ong Sa lakaw sa atong kinabuhi.

Ang orasan sa usa ka puya nga bag-ong natawo Daghan pa ang mga bas sa ibabaw nga sudlanan. Hinay ang ilang pagdagayday paingon sa ubos. Sa kinabuhi daghan pang katuigan iyang latason. Apan sa mga way-palad nga mga linalang

Wa pa gani masulat ang unang anib sa kinabuhi Ang bildong orasan kalit mapusgay ug ang mga bas Moalibwag sa wanang sa kasub-anan.

Padayon nga mohibos ang bas sa panahon Gikan sa ibabaw nga gisudlan kanila Ngadto sa ubos nga nagsangga sa matag tinulo. Kon may kinabuhi nga buot luwason gikan Sa sanggot ni Kamatayon ang Di-makitang kamot Mobali sa bildong orasan aron magpadayon Ang tawo sa tahas nga gisangon kaniya Sa Kahitas-an dinhi sa kalibutan.

Si Iyo Karpo nabako na sa daghang katuigan Nga iyang gibala sa duha niya ka mga abaga. Natuman na niya ang iyang tahas sa kinabuhi. Hapit na mapupos ang bas sa iyang panahon. Naglingkod siya sa silyang tuwangtuwang Nagpaabot nga mohubas na ang mga bas Sa iyang bildong orasan.