Pelicans midaog bisa'g naangol si Davis

Nagkumboya sila si Julius Randle ug Jrue Holiday aron tapakan ang haw-ang nga nahulma sa pagkaangol ni Anthony Davis ug agakon ang host New Orleans Pelicans ngadto sa dalaygong kadaugan batok sa ligong puwersa sa Oklahoma City Thunder, 131-122, kagahapon sa National Basketball Association (NBA).

Naangol ang wala nga bukton ni Davis dihang nagdepensa siya sa itsa ni Nerlens Noel sa hinapos nga bahin sa 2nd quarter.

Gikuyogan si Davis sa iyang agent paggawas sa korte aron magpa-MRI ug wala na kini mibalik sa duwa. Nagbilin siya og 14 puntos.

Mao na ba kaha kini ang katapusang duwa ni Davis isip sakop sa Pelicans? Panahon ra’y nasayod.

Dili pa lang dugay, nipadayag si Davis nga gusto na siyang mobalhin sa laing team.

Kini nga isyu nagtuyok na sa palibot sa NBA apan wala nagpaapekto ang Pelicans niini ug gipamatud-an nila nga kaya nilang mobarog naa o wala si Davis, kinsa maoy bugtong nilang All-Star.

Gipangulohan ni Randle ang Pelicans pinaagi sa iyang 33 puntos ug 11 rebounds samtang nidugang og 32 puntos si Holiday.

Ang Thunder gipangulohan na sab ni Russell Westbrook pinaagi sa iyang triple-double nga 44 puntos, 14 rebounds ug 11 assists.

Kini maoy ika-11 nga sunodsunod nga triple-doubles ni Westbrook nga nag-inat sa bag-o niyang rekord nga iyang giilog gikan kang legendary Wilt Chamberlain.

Si Paul George nidugang og 28 puntos alang sa Thunder apan tulo ra iyang napasulod sa 17 ka mga higayon nga miitsa siya sa three-point land.

Sa laing bahin, wala pa sab masayri kon makaduwa ba o dili si Davis sa gikaintapang NBA All-Star Game nga gikatakda karong Pebrero 18 (RP time) sa Charlotte.