Meralco Bolts gilampornas sa Team Pilipinas

Gipanglampornas sa Team Pilipinas ang Meralco Bolts, 100-82, kagahapon sa buntag sa usa ka tuneup game sa Meralco gym sa kaulohan.

Mao ra kini bugtong tuneup game sa Team Pilipinas alang sa ilang kampanya sa 6th window sa umaabot nga FIBA World Cup Asian qualifiers.

Nagpakita og saktong labok ang Team Pilipinas sa 2nd quarter diin gisugdan nila paglubong ang Bolts.

Gipangulohan sa Sugbuanong si Roger Pogoy ang Team Pilipinas pinaagi sa iyang 21 puntos, nidugang og 14 puntos si Marcio Lassiter samtang niamot og 13 puntos ang laing Sugbuanon nga si JuneMar Fajardo.

Ang Team Pilipinas nakatakdang molarga karong adlawa paingon sa Qatar nga ilang ikaharong karong Pebrero 21.

Human niini, atakihon na sab sa Team Pilipinas ang Kazahsktan karong Pebrero 24.

“We’d like to thank Meralco for making themselves available for our only tune-up game,” matod ni Guiao sa Spin.

“At least, even without Andray (Blatche), the guys are blending well. We played good defense and we are hoping we can still improve our defense.”

Si Blatche mipraktis sa Team Pilipinas sulod sa duha ka mga semana apan milarga kini paingon sa China dili pa lang dugay gumikan kay aduna kini laing obligasyon sa usa ka team sa maong nasod. Puntos matag usa Team Pilipinas (100) – Pogoy 21, Lassiter 14, Fajardo 13, Rosario 10, Barroca 9, Aguilar 6, Ravena 5, Thompson 5, Norwood 4, Castro 4, Almazan 4, Erram 2

Meralco (82) – Amer 14, Hugnatan 13, Salva 12, De Ocampo 11, Hodge 9, Jackson 4, Pinto 4, Canaleta 4, Caram 2.