Gikan sa Valentine's Day disco naligsan, namatay

Dalaga nga gikan ni-disco atol sa Valentine’s Day namatay human madasmag ang iyang motosiklong gisakyan sa prime mover sa alas 2:45 sa kaadlawon sa Biyernes, Pebrero 15, sa highway sa Brgy.Poblacion, lungsod sa Dalaguete.

Napiyapi ang kalawasan ni Ma. Belmalen Ysabel, 46, nagpuyo sa lugar human malatayi sa prime mover.

Samtang naangol iyang kauban nga si Alice Ramos, 23, kinsa maoy nagmaniho sa motorsiklong XRM.

Si SPO1 Rodrigo Teo, sa Dalaguete Police station nga nahinabi sa Superbalita Cebu nagkanayon nga gikan sa party ang mga biktima sa may reclamation sa lungsud.

Pagkakadlawon nanguli sila si Ysabel ug Ramos nga nanghuwam og motorsiklo.

Sa pag-abot sa eskinita, nibangga ang motorsiklo sa prime mover nga gimaniho ni Joe Estabela, 45, minyo, taga Manhuyod, Negros Oriental.

Ang prime mover nagkarga og mga balas gikan sa Santander paingon sa dakbayan sa Lapu-Lapu.

Sa kakusog sa pagkabangga, si Ysabel nga angkas nalagpot ug nalatayan sa ligid.

Nitahan si Estabela sa kapulisan.