Yeng masaligong mo-qualify ang Team Pilipinas sa FIBA World Cup

Masaligon si national coach Yeng Guiao kabahin sa poruhan sa Team Pilipinas sa FIBA World Cup Asian qualifiers tungod sa paghibalik ni naturalized player Andray Blatche.

Dul-an sa duha ka mga semana nga mipraktis si Blatche sa national team una kini milarga paingon sa China alang sa usa ka obligasyon nga kinahanglan niyang tumanon.

Ang Team Pilipinas makigbatok sa Qatar karong Pebrero 21 una kini moasdang sa balwarte sa Kazahkstan karong Pebrero 24 alang sa katapusan nilang duha ka mga tahas sa qualifiers.

Nagkinahanglang modaog ang Team Pilipinas ning maong mga duwa aron makaseguro og luna sa umaabot nga World Cup.

“I feel good about our chances especially with the way we blended with Blatche. We know Blatche is in a lot better shape now so mataas ang kumpiyansa ko that we can win these two games and go to the World Cup,” matod ni Guiao sa interbyu sa Gametime sa ANC.

Nagkanayon si Guiao nga nakadayeg siya sa kondisyon ni Blatche ning higayuna ug hasta sa gipakitang determinasyon niini aron makat-on sa iyang sestima.

“We know he can shoot the outside shot, may 3 point shot siya. He will demand the double team when he posts up and that’s going to create a lot of scoring opportunities for out shooters and scorers,” pasabot ni Guiao.

Gawas sa mga praktis sa Team Pilipinas, si Blatche miapil sab sa mga praktis sa NLEX Road Warriors aron masinati og insakto ang sestima ni Guiao, kinsa coach sab sa Road Warriors.