Google magbutang og wifi sa terminal
Gihangop sa tagdumala sa Cebu South Bus Terminal (CSBT) ang pagkapili sa maong pasilidad nga butangan og kusog nga wifi connection sa Google.
Ang Google nipahibalo nga magbutang sila og 50 mga wifi hotspot sa nagkadaiyang dapit sa nasud ug pagatawgon nila kini nga Google stations.
Matod ni CSBT operations manager Joy Tumulak, wala pay tataw nga schedule kanus-a kini mapatuman apan gihulagway niya kini nga dako ug tabang sa mga pasahero sa ilang cellphone sug uban pang communication gadget.
“Advantageous siya dinhi sa South Bus Terminal, for example dunay mga pasahero nga dugay makasakay, so while waiting, magkalingaw og kaykay sa ilang cellphone. Kadtong mga duna pay dapat buhatunon pinaagi sa cellphone o social media, at least ila pang mahimo,” niingon si Tumulak.
Ang Google wifi madugang unya sa existing nga duha ka wifi connections diha sa terminal nga gikan sa Cebu Provincial Government ug sa Smart Communications. Sigun ni Tumulak, dili sama sa unang duha ka wifi connection, unlimited na unya ang pag-gamit sa Google wifi apan kinahanglan lang molog in matag 30 minutos.
Matod ni Tumulak, dako og matabang pagpahibalo sa publiko sa mga kakulian sa biyahe ug sa kadalanan ang presensiya sa dugang wifi connection sa ingun nga paagi, masayod sa dagan trapiko.
“Nindot pud siya kay at least dali dab namo mapahibalo sa public ug dunay angay namo ipahibalo. Advantage siya sa mga pasahero kay makahibalo naman unya ang mga pasahero ug unsay sitwasyon sa atong dalan tungod sa lainlaing mga tawo nga mo-post pinaagi sa Facebook,” padayag ni Tumulak.