Menus na ang mga drug addict?

Mokabat sa 66 porsento sa mga Pilipino nagtuo nga nikunhod na ang gidaghanon sa mga drug addicts sa ilang dapit nunot sa gilusad nga gubat kontra drugas nga nikalas og libo ka libong mga kinabuhi, sumala pa sa ulahing survey sa Social Weather Stations (SWS).

Apan sa maong survey nga gihimo niadtong Disyembre 16 hangyod sa 19 sa miaging tuig sa 1,440 ka mga respondents, adunay 14 porsiyento nga nagtuo nga nisaka ang gidaghanon sa mga drug addicts samtang adunay 7 porsiyento nga niingon nga mao lang gihapon.

Wa ibutang sa maong survey kon unsay gibasihan sa mga respondents kon nganong nakaingon sila nga niminos na ang mga drug addicts sa ilang lugar. Dinhi sa ato, sagad makaingon ang mga tawo nga nangundang sa bisyo ang mga adika kaniadto kay nanambok na.

Si Presidential Spokesperson Salvador Panelo niingon nga ang maong survey maoy konpirmasyon sa kalampusan sa kampanya ni Presidente Rodrigo Duterte batok sa illegal nga drugas nga gilusad sa pagsugod sa iyang administrasyon.

Nikunhod na ang mga drug addicts kay daghan na man kanila ang nangatumba. Ang kapulisan mismo niingon nga moabot sa 4,999 ka mga drug suspects ang napatay atol sa mga legitimate operations.

Ang mga human rights groups niingon nga mahimong pil-on og katulo ang maong gidaghanon. Samtang sa usa ka survey, 95 porsento sa mga Pilipino niingon nga mas importante nga dakpon ang mga suspetsado sa ilegal nga drugas.

Ang makapahibung mao nga karon hinuon nga nikunhod na man kaha ang mga drug addicts, nagkadaghan man ang shabu nga nasakmit sa kapulisan sama niadtong pito ka kilong shabu nga nasakmit didto sa syudad sa Mandaue nga balor og P47 milyones.

Didto sa kadagatan sa lungsod sa Cagdianao sa Dinagat Island nabangalan sa usa ka managat ang 37 ka bloke, balig 88 kilos, nga cocaine. Si Philippine National Police (PNP) Director General Oscar Albayalde niingon nga di tumong ang pagbaligya sa cocaine dinhi sa Pilipinas.