Bag-ong tingusbawan para sa mga batan-on
Nahimo kong bisita sa usa sa mga karaan nakong higala tungod sa usa ka dinalian nga tuyo. Si Frank Rago akong gihapitan sa wa pa ko modiretso gahapon sa buntag sa akong biyahe sa Sitio Tigib sakop sa Barangay Lagtang sa siyudad sa Talisay. Ang akong tiyo maoy pagsuna kaniya sa karaan na kaayo namong gihisgutan nga mao ang pagtunol og libreng pagbansaybansay sa mga out of school youth sa natad sa house keeping.
Si Frank nga may lapad na nga kasinatian ning maong propisyon isip House keeping manager sa nagkadaiyang hotel dako og matampo pagumol sa mga batan-on ngadto sa pagka propisyonal nga trabahante sa natad sa house keeping. Di ikalimod nga kining maong matang sa trabaho panington gyud ka og maayo. Apan di sab malalis daghan ang nilampos og nakatigum. Gani ang uban nila tua na man sa mga dagkong hotel sa gawas nagtrabaho og nikita og dolyar. Ang uban naaa sa cruise ship naglawig sa halapad nga kadagatan.
Sa tinud-anay lang kong nagmagahi pa ko sa kagustuhan sa akong ginikanan di man unta Political Science ang kurso nga akong gusto. Ang diha sa akong hunahuna kaniadto kurso nga daling humanon aron maka trabaho dayon sama sa house keeping. Unya damgo sab nako kaniadto nga makatrabaho sa gawas.
Mao nga si Frank nahimo nakong idol human nga iyahang gipaambit kanako ang kanindot sa maong propisyon.
Gumikan niini, nakasaad ko nga kong itugot sa kahigayo- nan motabang ko pagpaambit ngadto sa mga batan-on ilabi na niadtong may plano nga makahuman og kurso.Pinaagi sa usa ka laing higala nga si Joe Veloria ang Sitio Tigib maoy among napilian nga ipailaila ang bag-ong tingusbawan.
Salamat nga madasigong gisanong ni Frank ang akong hangyo. Ang iyaha ra nga gipangayo nako mao kinasingkasing nga pagkat-on sa mga gustong moapil.
Pinaagi kang Joe nagsugod na siya karon pagpanglista sa nga interesado. Gani gawas sa house keeping nagpundok na sab si Joe og mga trabahante nga may kaalam sa natad sa construction.
Sa ingon niini nga mapasabot ngadto kanila ang mga angay tamdan alang sa malamposon nga panerbisyo sa nagkadaiyang construction. Way lalis nga dinhi sa ato kita ang tinubdan sa gitawag nga skilled workers. Gawas sa abilidad duna nay daghang rekisitos nga angayang tamdan aron nga magmalambuon ang panginabuhi.
Di man gud kutob ra sa abilidad basihan ngano nga ganahan ang imong amo sa imong pagka panday. Sa sinultian pa sa uban kinahanglan ang diskarte nga maoy tuyo sa maong programa nga gusto natong ipaambit sa mga nanginahanglan. Gitawag na siya og maayong labok apan minos ang superbisyon kay niagi sab og mga training agi og pahaum sa panginahanglan sa employer.
Bisan gani sa pakyaw system sa trabaho nga gusto natong palambuon importante kaayo kini isip bugti sa dakong salapi nga gastohon sa mga gustong magpatrabaho sulod sa ilang balay.