Sharks batok Sardines sa MPBL karong gabii

Magpaduol og samot sa seguradong luna sa playoffs ang Cebu City Sharks sa ilang pagpakigbatok sa Zamboanga Family’s Brand Sardines Valientes sa premirong duwa karong gabii sa Maharlika Pilipinas Basketball League (MPBL) Datu Cup sa Marist School gym sa Marikina City.

Ang Sharks ni coach Titing Manalili kasamtangang nahiluna sa ikaunom nga dapit sa South Division nga nagtangag og 11-12 nga rekord samtang naa sa ikawalong puwesto ang Valientes nga adunay 9-12 nga rekord.

Ang mopatigbabaw nga walo sa South ug hasta sa North divisions mao ang makaabante sa nagkaduol nga playoffs.

Pareho man tuod nga naa sa top 8 ang Sharks ug Valientes sa ilang division apan pareho kining wala pa nakaseguro og luna sa playoffs tungod sa kasikit sa standings.

Ang mapilde ning sangkaa posibleng malabay og layo sa standing depende sa resulta sa ubang nahabiling mga duwa.

Gilauman nga grabe kakulbahinam ang masaksihan ning sangkaa gumikan kay parehong gikan sa dagkong kadaugan ang duha ka mga kampo.

Sa main game, magsangka ang host Marikina Shoemasters (8-12) ug Bataan Risers (20-2).