MGA PULIS IPANGKIHA

Kabanay sa gipasanginlang drug personality nga namatay sulod sa Tuburan District Hospital nagplano sa pagkiha batok sa mga pulis nga nipahigayon sa anti-drug operation, diin siya napusilan ug batok sa mga tinugyanan sa tambalanan nga nikuha ug ni-upload sa video sa social media, makita nga naglisud ug wala atimana ang pasyente.

Samtang, ang secretary of Health naalarma sa nag-viral nga video ug nangayo sab og report labot sa hitabo.

Si Gobernador Hilario Davide III, sa iyang bahin, nipatawag sa mga nalambigit nga nurse, nga gituohang nikuha sa video ug ni-upload sa social media.

Gilubong na niadtong Dominggo ang giingong drug personality sa lungsod sa Tuburan nga si Gembe Casas, nga napusilan sa kapulisan atol sa giingong buybust operation.

Siya gidala sa Tuburan District Hospital, diin siya matod pa wala atimana ug gikuhaan na hinuon og video sa mga nars sa tambalanan ug gi-upload sa social media.

Si Atty. Vincent Isles sa Cebu Action Group niingon nga giabagan sa ilang grupo ang pamilya ni Casas, ilabi na kay interesado nga mosang-at og kaso batok sa mga pulis ug sa Tuburan District Hospital tungod sa giingong kwestiyonable nga operasyon ug sa giingong wa dayon pagtabang sa pasyente hinungdan sa kamatayon niini.

Hinuon matod ni Isles, wa pay pinal nga desisyon ang pamilya ni Casas kay nibati kini og kahadlok nga balikan sila.

Naglibog sila kon molungtad ba ang kawsa nila pagpangita og hustisya.

“Medyo hadlok pud ang pamilya ba. Ila pu’ng gi-consider ang possibilities karon kon mo-prosper ba kay og dili mo-prosper, nganong maghago-hago paman ta. We are still keeping our options open,” niingon si Isles.

Ang tulo ka mga nurse nga una nang gisuspenso tungod sa nikatap nga video, gipatawag ni Davide sa Kapitolyo.

Wa makauyon ang gobernador sa ilang gihimo, ilabi na kay makita sa video nga daw sa wala silay gibuhat aron tabangan ang pasyente.

“Mao na’y akong nalagutan. Nganong kuha-kuhaan pa man og video gud nang pasyente nga nag-antos na. People get the impression, kadtong nakakita na (sa video), nga wala atimana,” padayag ni Davide.

Nagpadayon ang imbestigasyon sa Provincial Health Office sa insidente sa Tuburan District Hospital ug suspendidto ang tulo ka mga job order nurses nga giingong nalambigit sa pagkuha ug pag-upload sa video.

/ ALAN TANGCAWAN ■ MODAGAN: Ang kandidato sa Barug PDP Laban pagkakonsehal sa south district nga si Eric Espina nisaad nga kompleto ang slate sa ilang partido, nagpasabot nga modagan siya og dayon sa Mayo 13, 2019 nga eleksyon. Sa iyang paglusad sa “gugma” nga kandidatura, iyang gipahibawo nga prayoridad mao ang katukoran sa evacuation centers panahon sa katalagman, pagpalambo sa serbisyo alang sa senior citizens ug panglawas. Ilang gipaabot nga moanhi dinhi sa Sugbo si Presidente Rodrigo Duterte sa Cebu karong Pebrero 24.