Groundbreaking sa P1.3B Capitol building
Gisubhan na ang katukuran sa balor P1.3 billion nga high-rise building sulod sa Capitol compund nga mao ang Cebu Provincial Resource Center niadtong Lunes sa buntag, Pebrero 18.
Nisaksi silang Gob. Hilario Davide III, Bise Gob. Agnes Magpale, Provincial Administrator Mark Tolentino ug mga department heads ug ang mga tinugyanan sa Development Bank of the Philippines, WT Construction, Inc. ug AS Enriquez Engineering Consultancy sa gipahigayon nga groundbreaking ceremony sa Cebu Provincial Resource Center.
Ilang gilubong ang time capsule nga nagtinir sa plano sa tukoron nga edipisyo diha mismo sa site nga pabarugan niini, kilid sa Capitol executive building.
Sa hamubo nga programa pinasubay sa groundbreaking ceremony, gipadayag ni Davide nga taliwala sa mga kontrobersiya ug mga pagsaway nga naangkon niya ug sa Kapitolyo sa planong pagpatukod sa high-rise nga edipisyo, karon wala na’y makapugong niini.
Nagpasalamat ang gobernador sa DBP sa pagpahulam niini og P1.5 billion nga pondo aron mapatukod ang resource center. Gihulagway niya nga “best deal” ang nakuha sa Kapitolyo gikan sa maong bangko kay anaa lang sa 2.9% ang interes nga kinahanglang bayran matag tuig sulod sa 10 ka tuig.
Subling gipdayag ni Davide nga dili alkanse niini ang provincial government ug dili sab mabulos sa pagbayad ang mga magbubuhis nga Sugbuanon kay himuon man kini nga income-generating, diin mayoriya sa mga bahin sa edipisyo ang paabangan.
“Most of these spaces will be leased by private or even public corporations or individuals maybe, aron mo-earn pud ni og income and we will be able to pay our loan with DBP without burdening the Cebuano taxpayers. According to our Finance Committee, kung duna man gani taxpayer’s money nga ma-involve niini, minimal ra and kaya ra nato,” niingon si Davide.
Sayo niining buwana hingpit na nga nahatag sa Kapitolyo og notice of award sa proyekto ngadto sa WT Construction ug napirmahan na usab ang notice to proceed ug kontrata alang niini.
Nagpasalamat usab si Davide sa Hunta Probinsiyal, taliwala sa ilang pagkabahinbahin, sa pagsuporta sa katukuran sa proyekto bisan sa linya sa politika.