You don’t belong to me
Sus, kon wa pa lang ko magpugong sa akong kaugalingon, kasaban gyud unta nako si Rayner. Ngano gud tawon siya nga mangabubho man? Unsay labot niya sa akong kinabuhi nga friend man lang mi? A, basig naghunahuna siya nga girlfriend ko niya?
Mikatawa na lang ko. Gikatawa ko na lang ang akong kalagot.
“Look, Rayner, amigo man lang ta, di ba? Oo, nangulitawo ka nako pero wa pa man tika sugta. It means, di ka angay magselos kon duna koy kaubang laki.”
Gihinay ko pagsulti kang Rayner ang nia sa akong hunahuna. Nakatan-aw siya nako pag-ayo. Unya nagpanglingo siya.
“Sorry, Judith. Wa lang ko makapugong sa akong emosyon and you know kon nganong naingon ko ani.”
Wa nay kasuko nga nakita ko sa nawong ni Rayner. Nanghupaw ko.
“Rayner, mituo ko nga love gyud ko nimo. Pero wa pa man gyud sa akong hunahuna nga mosu’od anang butanga. I mean, di pa ko andam nga mosu’od sa usa ka seryusong relationship.”
Mihinay ko paglakaw paingon sa akong classroom. Mikuyog si Rayner nako.
“Wa man sab ko magdali-dali, Judith. The most important nga gikasulti ko na nimo ang akong gibati.”
Miyangu-yango ko. Nagsmile si Rayner nako. Maayo na siyag buot. Aw, mipahiyom sab ko niya. Human sa akong klase niadtong adlawa, midiretso na kog pauli. Wa mi magkakuyog si Rayner kay miadto siya sa library. Duna siyay gi-research nga assignment sa usa niya ka subject.
“Unsa na kaha kon uyab na mo, no, Judith? Na, karon pa lang gani nga nangulitawo siya nimo, nga wa pa nimo siya sugta puwerte na man niyang pagka seluso?”
“Di man siya angay kong sugton, Mariz. Ikaw nuon.”
“Unsay ako nuon? Pag-sure diha, uy, Judith.”
Mikatawag kusog si Mariz. Nagtapad mig sandig sa headboard sa kama sa sulod sa among kuwarto. Mao pay pagkahuman namog panihapon. “I’m serious, Mariz.” Mihunong pagkatawa ang akong ig-agaw. Mitan-aw siya pag-ayo nako. This time, seryuso na siya.
“Please, ayaw ko balibari, Mariz. I know nga nakasabot ka sa gusto kong mahitabo. Di lisod mahalon si Rayner. Tall, dark and handsome siya. Aside from that, buotan ug kasaligan siya.”
Napanid-an nako nga naghunahuna pag-ayo si Mariz. (SUMPAYAN)